SUPERBALITA CEBU

Dalagita namatay sa sunog

GITUOHAN sa kabomberohan nga nag-headset samtang naminaw og music ang 14-anyos nga dalagita nga namatay sa sunog sa sityo Amor, Barangay Sambag 1, Dakbayan sa Sugbo sa Sabado sa kaadlawon, Oktubre 19.

Mao kini ang nitumaw sa ilang imbestigasyon, matod ni SFO3 Oliver Tautho, imbestigador sa Cebu City Fire Department, sa pagkasunog og apil ni Dawn Therese Awi, 14, tinun-an sa high school sa Southwestern University (SWU).

“Posibleng wala nakadungog ang biktima. Naka headset man gyud ni siya mao to nga wala siguro nakadungog sa saba sa gawas nga dunay sunog,”matod ni Tautho.

Si Tautho niingon nga si Ma. Yoradyl Awi, inahan sa dalagita, nisulti kanila nga wa sila atol sa hitabo kay nanarbaho.

Human sa sunog, nakaplagan sa mga bombero ang napaig nang lawas ni Ma. Therese.

Ang sunog niugdaw sa 38 ka mga balay ug nakaapekto sa 98 ka mga pamilya.

Nadawat sa kabumberohan ang alarma sa sunog alas 2:35 Sabado sa kadlawon.

Pag -abot sa mirespondeng bombero, gisaka dayon ngadto sa second alarm alas 2:39.

Giingong nagsugod ang kayo sa balay ni Diano Flores nga gipuy-an sa iyang igsuon nga si Glenn.

Gituohang electrical misuse ang hinungdan sa kayo.

Dugang ni Tautho nga base sa mga pamahayag sa managsuong Flores, hayan ang wa matanggal nga linya sa kuryente sa aquarium o suga nga wa mapawong.

Nagsugod ang pagsilaob sa kaayo alas 2 sa kadlawon sa ground floor sa balay sa mga Flores.

“Miyembro man gud ni sila sa banda mao to nga gibiyaan nila ang balay. Sigon sa statement nga nakuha nato nila, nakapansak pa ang (linya sa kuryente) aquarium ug wala mapalong ang suga. So, probably mao to ang hinungdan,” matod pa ni Tautho.

Gawas sa 38 ka mga balay, lakip sa naapektuhan ang pipila ka bahin sa Cebu City sports center, nga naglakip sa props room, audio room ug uban pang mga lawak sa grandstand.

‘Naluwas’ sa iro

Usa sa mga nasunogan si Nevj Villaruel, 45, kinsang balay tupad sa mga Flores, niingon nga naluwas sila sa iro.

Matod pa ni Villaruel nga uban ang iyang asawa niadtong tungora, nangatulog sila.

Nahigmata siya ug nakadungog sa paghot sa iro nga pitbull.

Gipasusi ni Villaruel sa iyang asawa ug didto nila nakita nga duol na ang kayo sa ilang balay hinungdan nga dali silang nanggawas.

Iyang giuna pagpagawas ang ilang motorsiklo ug gamay ra ang ilang nadala.

“Naluoy ko sa iro, Sir, oi. Ang nagluwas namo wala hinuon nako maluwas,” pulong pa ni Nevj.

Dunay mga sapot nga ilang na dala apan mga gamit nila tanan naapil pagkaugdaw.

Alas 8:50 na sa buntag gideklarar nga fire out human sa overhauling.

Niduaw dayon sa nasunogan si Cebu City Mayor Edgardo Labella kagahapon sa buntag.

Iyang gipakigkitaan si Ma. Yoradyl aron mopadangat sa iyang pahasubo.

Iyang gialam-alaman ang inahan nga nagsige na lang og hilak tungod sa kamatayon sa anak.

Nipasalig usab si Labella nga moabag ang Siyudad sa pagpahiluna kang Ma. Therese.

Matod pa ni Labella nga mimando na siya sa City Social Welfare Services sa paghatag dayon sa labing unang hinabang.

“Ang Siyudad, sama sa ing-ani nga mga kalamidad, mohatag dayon og tabang labi na sa pagkaon,tulo ka adlaw nga mag-apud-apud,” pasabot sa mayor.

Tag P20,000 usab ang ihatag nga pinansiyal sa mga nasunogan matag pamilya aron dunay magasto sa pagpatukod sa ilang balay.

Dunay ipahigayong re-blocking sa lugar labina kay naglisod ang mga bombero sa pagsulod sa dapit.

Klase magpadayon

Naapektuhan og gamay sa sunog ang University of Cebu senior high school building.

Matod ni Candice Gotianuy, UC Chancellor, niingon nga ang mga klase ug scheduled final exams magpadayon bisan sa sunog.

“The students, unfortunate for them. The fire will not stop the final exams from happening. We will still continue the classes on Monday while the clean up works will go on and continue this weekend. By Monday, we should be okay,” matod ni Gotianuy sa Sunstar Cebu.

Matod niya nga gamay ra ang kadaut ug mo-assign sila og mga lawak hulip sa apektadong mga lawak. (Dugang taho ni WBS)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph