SIYAM ang patay, laing 17 ang grabeng nasamdan dihang nahulog sa lawom nga pangpang ang usa ka trak didto sa probinsiya sa Cotabato.
Sa report nga nakuha gikan sa Cotabato Police Provincial Office, alas 3:45 sa kaadlawon, Marso 10, nahitabo ang mangilngig nga aksidente.
Sakay ang mga biktima sa usa ka dumptruck gikan sa ilang pinuy-anan sa barangay Sebya, Matalam, paingon sa Polomolok, South Cotabato.
Sumala pa nga mamalaye unta ang pamilyang Mondragon sa dalaga nga pangasaw-anon sa ilang paryente.
Apan pag-abot nila sa barangay Bagontapay, M'lang Cotabato, kalit lang nga mibuto ang preno sa dumptruck.
Bisan gi-unsa pagmanipula, wala na gyud makontrola sa drayber ang manobela, diretso kini nga nahulog sa lawom nga bung-aw kilid sa kalsada.
Matud ni Ariel Manuto, ug molupyo sa dapit asa nahitabo ang aksidente nga iya gyud nga nakit-an nga tulin kaayo ang dagan sa gisakyan sa mga biktima.
Pag-abot sa kurbada nahulog ang sakyanan sa pangpang.
Dali sab nga mitabang ang mga molupyo sa lugar, gidali pagdala ang mga biktima sa duol nga balay tambalanan.
Pahayag ni Mlang Mayor Lito Piñol nga sagad sa mga biktima nga namatay sa ilang kinabuhi mao kadtong nanga-ipit.
Mga samaron padayong gitambalan karon sa Tulio Pavali Hospital sa Tulunan Cotabato.
Ang uban kanila gibalhin sa Davao Medical Center tungod sa grabeng kahimtang.
Gitahasan na ni Cotabato Governor Jesus Sacdalan ang Provincial Health Office nga susihon ang sitwasyon sa mga naangol aron matabangan dayon kini sa pagdala sa laing hospital nga dunay hitsas nga gamit.
Ang kapulisan padayong nag-imbestiga sa hitabo.
Gitino nila ang rason nga mibuto ang break sa trak, o ang sulti-sulti nga nakatagpilaw ang drayber rason nga nahitabo ang aksidente. (Edgardo Fuerzas)