SUPERBALITA CEBU

3 tulisan 'nangilog og armas,' patay

TULO sa pito ka suspek sa pagtulis sa usa ka pawnshop ug money changer sa sulod sa J Centre Mall sa A.S. Fortuna sa Dakbayan sa Mandaue nga nadakpan sa Bogo City Police Station ang napatay sa dihang giingong nangilog ni og armas sa mga pulis.

Sa pagsuwat ning balita, dili pa makahatag sa pangalan si Police Colonel Jonathan Abella unsay mga pangalan sa tulo ka suspek nga namatay tungod padayon pa sila sa imbestigasyon.

Iyang gibutyag nga human sa alarma sa tulis sa J Centre Mall, nagpatabang dayon sila sa mga silingan nga police station sa probinsya sa Sugbo nga molusad og checkpoint aron madakpan ang mga tulisan.

Miabag na usab ang Regional Special Operation Task Group (RSOTG) Central Visayas sa pagtawag sa tanang police station sa probinsya ug sa mga silingang dakbayan nga mag-alerto ug atngan ang mga suspek.

Gihatag ang tanang paghulagway sa mga suspek lakip na ang dala niini nga sakyanan nga maoy getaway vehicle ngadto sa mga police station.

Pagka alas 11:15 Sabado sa gabii, Oktubre 19, 2019 sa Barangay Polambato, Dakbayan sa Bogo diin naa nahimutang ang pantalan nga mopaingon sa Masbate, nakabantay si Police Staff Sergeant Jojit Potot sa Toyota Innova nga adunay plate number ZRM 489 ug tulo ka motorsiklo nga maoy gipahibawo sa RSOTG Central Visayas.

Nakita usab niya nga kadudahan na ang mga sakay niini. Dali niya kini nga gidakop diin usa niini samdan.

Ang mga dinakpan giila nga silang Roel Nano Sumingit, 35, taga Tangub City Misamis Occidental; Jun Batanguso Candelaria, 38, taga Naga City, Bicol; Julivy Lumingkit Quirante, 43, taga Tangub City; Arnel Sumongit Cimafranca, 38, samdan, taga Tangub City; Kevin Plaza Andales, 25, taga Lorenzotan Tangub; Wilfredo Suerte Enguito, 47 ug usa ka wala pa mailhi.

Nakuha sa mga dinakpan ang .38 nga revolver, cellular phones, kuwarta nga wala pa matino kon pila, tools sa sakyanan, mga nagkadaiyang sapot ug ang mga sakyanan.

Uban ang mga sakop sa RSOTG Central Visayas nga maoy midala sa mga suspek sa sakyanan aron ihatod sa police station sa Bogo, tulo ka suspetsado ang nangilog og armas sa pulis.

Matod sa report sa Bogo Police Station, nagbinirahay pa ang pulis ug ang tulo ka suspek sa armas nga maoy hinungdan nga ang kauban niining pulis ang mipusil sa tulo nga miresulta sa ilang kamatayon.

Susama ni Police Lieutenant Colonel Emily Santos, hepe sa Bogo City Police Station, wala na nila makuha ang mga alahas nga natulis sa mga suspek tungod gidala, matod pa, kini sa lain nilang mga kauban.

“Wala sila motug-an asa ang alahas kay gisulod daw nig usa ka bag 'nya naa may isa ka bag gud nga gikuha from them, gisakay atong usa ka sakyanan nga wala namo ma-trace asa paingon pero disseminated nato ang color sa sakyanan,” matod ni Santos.

Giingong kapin sa P100 million ang balor sa mga alahas ang nakuha sa mga tulisan.

Sa nakuha nga kasayuran sa mga pulis sa Bogo, kapin sa napulo ka mga tawo ang nanulis sa Mall diin ang uban kanila wala na magkaila.

Nag-abang matod pa silag usa ka lodging house atbang sa mall aron magpaabot kanus-a nila tulison ang pawnshop ug ang money changer.

Ang uban kanila duha na ka semana nga nag-abang sa lodging house samtang nangabot usab ang lain nila nga kauban duha ka adlaw pa lang ang nakalabay.

Makig-alayon pa sila sa ilang counterpart sa Mindanao kon unsa nga grupo ang nadakpan nga nanulis. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph