BAGUIO

Luzano: Panaglupos ti PNP... Masapul a mabantayan!

Karit Ken Kayetket

MABANTAYAN... daytoy ti umno a termino para iti reporma a maipakat iti kapulisan wenno pakabuklan ti Philippine National Police (PNP).

Masapul nga iti panagbantay... nasiputtayo, kailian. Di rumbeng tay agtuglep amangan ta masingitan dagiti sairo iti puwersa. Ngamin iti maysa laeng a kirem ti mata... adun dagiti sumngat a rinet a no saan a masaluadan, agbalinto manen a higante a parikut ti kagimongan.

Ngarud, ditay koma iturogan no mabalin ti intay panagbantay tapno maguwardian dagiti palusot ta nasikapen dagiti kiteb a mabmabsog iti illegal nga aramid a pakaisagmakan ti biag ken dignidad ti gimong.

Ngem sakbay nga intay karintaren daytoy nga isyu... intay pay lagipen ti napalabas kadagiti gimmiddan a kontrobersiya:

***

Iti pannakaisursurat daytoy nga espasyo... manarimaan pay laeng ti panagsukisok nga ar-aramiden dagiti concerned agencies iti imbunga ti napigsa a ginggined iti deppaar ti Mindanao itay nabiit.

Pagyamantayo ta manmano dagiti naipatli a biag ngem adu a pasdek ken sanikua ti nadadael. Sinentro ti ginggigined ti deppaar ti Cotabato area a sinaruno met ti gistay gimmiddan a ginggigined met idiay Davao.

Napasamak met ti maysa nga uram iti dakkel a mall sadiay Cagayan de Oro idi napasamak ti ginggigined. Pettat wenno di napakpakadaan ti nakuna a didigra banag a nangibunga iti aligaga wenno danag nangruna kadagiti disso a mabalin a pakapasamakan manen ti napigsa a ginggined.

Nabayagen a panawen a mapagsarsaritaan ti “the big one” iti depaar ti NCR (National Capital Region).

Addan dagiti pamkuatan nga inaramid ti gobyerno idi ken ita tapno masaluadan ti nakaro a trahedya iti biag ken sanikua... no kas pangarigan ta mapasamak ti “the big one.”

Kina-alerto ken panagsagana ti kangrunaan nga addang. Awan ngamin pay dagiti ramit a makaibaga no kaano a mapasamak ti maysa a ginggined ken no kasano’t kapigsana.

***

No ginggined ti pagteng sadiay Mindanao, ASF (African swine fever) met ditoy Luzon, karkarna met ti pasamak ditoy Benguet.

Ngamin itay laeng nabiit, adda walo a bangkay ti nasarakanda idiay Poyopoy, Marcos Highway a sakup ti Tuba, Benguet. Maryusep! Saan laengen a maysa wenno dua... no di ketdi walo, pards.

Kadagita a bilang, duan ti rurog a kayatna a sawen a nabayagen dagitoy a naibelleng dita. Nabigbig ti maysa kadagiti biktima a kuna dagiti nagimbestiga ket bunga kano ti “salvage”.

Ti nabigbig ket taga-Mindanao ken maysa a negosyante idinto ta agtaltalinaed a Mr. X dagiti pito nga adda ita iti maysa a punerarya idiay Marcos Highway. No awan makabigbig ken ag-claim kadagitoy... maitabunton kas kuna ti report.

Saludsod: nagsubli kadi manen ti “salvaging”? Mailagip, manon a tawen ti napalabas...adda dagiti bangkay ti nasarakanda iti naduma-duma a paset ti Kordillera partikular iti Marcos Highway (Poyopoy).

Awan a pulos ti naitudo a suspects kadagita a krimen. Iti agdama, adda dagiti addang kas bunga ti singasing ti maaramid iti paset ti Poyopoy.

Maaladan kano ti disso ken manayonan dagiti silaw. Ngem no sibibiag daydi lolok, agsakuntip laeng daytoy. Mabalin a kunaen ni lolok nga uray pay no silawam ken aladam dayta a disso, sutil dagiti kriminal. Iyalisda ti pagibellenganda.

Ti ketdi aramiden dagiti otoridad ay ket ingitanda ti agbantay kadagiti amin a mabalin a pakapasamakan dagiti kastoy a krimen. Kasta ti utek daydi lolok ta sigud ngamin a guardiya-sibil idi panawenda.

Ngem angpepna, dina naguardia-an ti nobyana isu nga intaray ti sabali isu nga nagtungpal ti gasatna kenni lolak a katipunera.

***

Mayat man ti singasing a tapno di unay nakaro ti trapik idiay Metro Manila... masapul a mayakar koma iti probinsiya dagiti nadumaduma nga ahensiya ti gobyerno a nakabase iti NCR.

Pabor iti daytoy a singasing ti sibubukel a Federation of Filipino Chinese Chamber of Commerce and Industry Inc. (FFCCCII).

Kas kuna ni Federation President Dr. Henry Lim Bon Liong, no daytoy ti makasolbar iti nakaron a trapik idiay Metro Manila, umanamongda a maipan iti probinsiya dagiti opisina ti gobyerno agraman Malakanyang.

Kinapudnona, mabalin a marugianen inton 2022 ti konstruksiyon ti Phase 2 ti New Clark City iti sidong ti National Government Administrative Center (NGAC) sadiay Tarlac.

Kas kuna ni Bases Conversion Development Authority President ken CEO Vince Dizon, ennem nga ahensiya ti gobyerno ti mangipatakderton iti opisinada sadiay Tarlac.

Karaman dita dagiti sumaganad: DICT (Department of Information and Communications Technology), DOST (Department of Science and Technology), Neda (National Economic and Development Authority) ken imprenta ti kuarta ti BSP.

Addanto payen dita ti satellite offices ti Suprerme court, Court of Appeals, Court of Tax Appeals ken Sandiganbayan.

Nainpanawenan dagitoy a programa ti agdama nga administrasyon. Sapay koma ta daytoyen ti pudpudno a long-term solution iti parikut ti trapiko wenno kondyestiyon ti Metro Manila. Ti la adda dita ngaminen a suhestiyon dagiti natataraddek ti utekna: addaka dita a double deckker kano a bus.

He he... pangturista laeng dayta ngem no kargaam iti agririgudon a pasahero... amangan ta matulid ketdi, kunada.

Addaka dita maistriktuan ti panagaramat iti lugan a magna iti Edsa... ngem adda aya linteg a mangiparparit kadagiti umili a gumatang iti luganna?

Addaka dita a pannakaiparit a sumrrek iti Edsa dagiti buses manipud probinsiya. Saan aya a pammarigat laeng daytoy kadagiti marigrigat a biyahero?

Adda pay ketdi immarasaas: maymayat no tuladentayon dagiti dadakkel a siyudad ti Tsina a bisekleta ti usarda.

Hehe...magmagnatayo ketdin ta makatulong iti salun-at.

Total, makasangpetkanto met laeng iti destimon kalpasan iti tallo nga oras ken tallo a bulan! Ngek!

***

Subliantayon ti tema a linis-imahe ti kapulisan. Kas kapudpudotanna pay laeng a pammilin ti dipay pimmudot iti akemna a kas PNP-OIC Chief a ni Lieutenant General Archie Gamboa—maipariten kadagiti pulis ti agay-ayam iti “GOLF” iti weekdays wenno Lunes agingga’t Biyernes.

Iti pammilin, awan santuenna, opisyal man wenno saan basta pulis. Mabalinda met kano ti ag-golf tunggal Sabado ken Domingo. Immanamong met ti baro a naipatugaw nga NCRPO (National Capital Region Police Office) Chief a ni Brigadier General Debold Sinas.

Ni Sinas ti simmukat kenni sigud nga NCRPO Chief a ni Major General Guillermo Eleazar a naital-o a baro a PNP Directorial staff, ti maikapat a kangatuan iti PNP.

Maysa pay a pammilin ni General Gamboa ket naidalan iti ballaag kontra kadagiti pulis nga umawat ken agdawat iti tong wenno lagay wenno pasuksok.

Saludsod: kadagita a pammilin, saan aya ramen dagitoy iti inadal ken sinapataan dagiti otoridad sakbay a nagakemda? Ammoda ti dagsen ti pannusa a katukad iti panaglabsing kadagita a pammilin. Ngem apay ngata nga adu latta dagiti subeg?

Iti ababa a pannao... apay nga adda dagiti kameng ti PNP ti timmapog iti illegal a recycling ti droga imbes koma a tumulongda iti iradikasyon ti droga?

Kuarta kadi ti makagapu? Saan aya a naingaton iti kasta unay ti sueldoda? Dida kadi pay mapnek? Wenno timmulangen dayta nga aramidda?

Ngarud...masapultayo ti napinget a takder ken determinasyon a madalusan ti sibubukel a puwersa sakbay nga agkayamkam. Agsaludokami iti programa a panagdalus ket surotenmi dagita nga addang kabuyog ti kararag a “sapay koma Apo ta agballigi.” Adios mi amor, ciao, mabalos!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph