FREDRICK F. GELBOLINGO
121 Prenza, Argao, Cebu
SA USA ka lugar sa mga eskuwater nga kabahin sa siyudad sa Sugbo, adunay usa ka tiguwang babaye, 90 anyos, ang nagpuyo. Bisan siya nag-inusara na lang sa iyang barungbarong, malipayon siya sa iyang pagpuyo. Mapahiyumon kaayo siyang moawit ug mokiaykiay kon makadungog sa mga sonata sa kanhiay niyang panahon sa iyang kabatan-on. Niini malingaw kaayo ang iyang mga silingan.
Buntag pa ganing sayo makabantay na ang iyang mga silingan nga manilhig siya sa iyang nataran. Sila moduol dayon kaniya ug patukaran sa iyang mga paboritong kanta. May magdalag transistor radio, may cassette recorder, component, battery-operated cassette ug mga sound nga gikan sa selpon. Magpuli-puli lang kini sila kon kinsa ang makauna pagmata. Bata ug tigulang, nakauyon gayud sa inawitan ug sinayawan ni Lola Lolaly.
Kon minathanay lag sayo, lupigon man sila ni Lola. Sayo kaayo kining mosugat sa pagsilang sa Adlaw pinaagi sa pagkanta: ‘My toes, my knees, my shoulder, my head’ uban sa kanta ni anhing Yoyoy Villame nga: ‘Mag-exercise tayo tuwing umaga’ gikan sa iyang gamay nga radyo nga gipatong niya sa bangko.
Kon dunay motimbaya kaniya nga silingan og ‘Maayong buntag, La!’, malipayon siyang motubag, ‘Maayong buntag pod!’ Ingon sad ini ang mahitabo kon timbayahon siya sa udto o sa hapon.
Paglabay sa napulo ka tuig nabantayan sa mga silingan nga kada hapon magluya si Lola. Maglingkod siya sa bangko nga giakbo ang iyang suwang sa iyang sungkod. Usa ka higayon wa kini kadasig pagtubag sa ilang timbaya nga ‘Maayong hapon, La!” Bisan pa og gingisihan nila kini ug gikanta-kantahan ug gisayaw-sayawan sa iyang atubangan, wala kini mokihol. Hinuon mitubod ang mga luha sa iyang mga mata ug mibakho taman sa ginhawa.
Usa ka adlaw, giduol si Lola sa mga silingan nga nasayod nga kining adlawa maoy ika-100 nga sumad sa iyang pagkatawo.
“Lola, maayong hapon, La!” timbaya ni Manang Linda.
“Maayong hapon pod!” ni Lola Lolaly.
“Karon ang ika-100 nga sumad sa imong adlawng natawhan. Makadawat kag P100,000 ka pesos gikan sa City Hall pinaagi sa Centennary Act, uban sa himsog nimong panglawas,” ni Manang Linda.
“Maayong hapon kanimo, Lola!” matod sa tigpamaba sa City Hall nga kuyog ni Manang Linda. Nagpahiyom kining mitunol sa usa ka brown envelope nga gisudlan sa kuwarta ngadto kang Lola. May dugang pa nga mga groseri.
Apan nahibulong na lang siyag maayo uban sa iyang mga kauban kay kalit nga mihilak si Lola ug midanguyngoy. Ug unya miingon, “Way maayong hapon mga Undo! Kay usa kadto ka hapon gipanamastamasan ko sa usa ka batalyon nga mga Hapon panahon sa ikaduhang gubat sa kalibutan!” (KATAPUSAN)