SUKAD sa paglingkod sa atong Presidente Rodrigo Duterte isip ika-16 nga presidente sa Republika sa Pilipinas, iya dayong gipakita ang lad-ang nga pagtagad sa America nga nahimong kaalyado sa atong nasud kapin sa usa ka gatos ka tuig.
Gani una niyang gibisita ang nasud sa China hangtud nga kalima na siya nagbalik-balik sa maong nasud ug kaduha sa Russia, kon diin adunay bilateral agreement tali sa Pilipinas.
Kon atong sumadahon pag-ayo nga walay labot nga intriga, matawag kita nga wala gyud siya'y gana sa America, gani, pila ka higayon nga gi-imbitar ni Presidente Donald Trump pero wala gyud niya kini tagda ug dinhi atong namatikdan nga welcome ang atong presidente kang Trump, pero dili siya welcome sa American legislator.
Kining tanan tungod sa mga intriga sa mga oposisyon nga sa unang tuig sa administrasyon sa atong presidente, madugo alang sa pagpatuman sa kampanya batok ginadili nga droga, ug ang gipagawas sa mga kaaway sa politika sa atong presidente mao ang extra-judicial killings (EJK), ug kini maoy nakapadaut sa rekord sa atong presidente sa mga magbabalaod sa America.
Tingali dili sab mabasol sa mga magbabalaod sa America si presidente Duterte tungod kay unang-una, sa America gyud unta siya mopalit og mga armas para sa atong armadong kusog sa Pilipinas, ug sa atong mga kapolisan apan tungod sa intriga sa mga dilawan, nadaut ang rekord sa atong presidente Duterte.
Niining bag-o lang, atong nabati nga moduaw daw ang atong presidente ngadto sa America, apan dili pa daw karon kay bugnaw pa ang panahon didto pero sa atong pagpaniid mura og dili seryoso ang atong pangulo.
Unsa kaha'y buhaton sa America sa Pilipinas niining gipakita karon sa administrasyon? Posible kaha nga adunay sanction nga pagahimuon ang America sa Pilipinas sama sa iyang gibuhat sa ubang mga nasud nga nagpakita nga buot motiwalag sa ila?
Sa atong pinobre nga pagpangagpas basig dili, kay kapin sa usa ka century ang pagpanag-uban niining duha ka nasud, ang katapusang himuon sa Estados Unidos tingali mao ang “economic sanction.”
Kontrolado pa gihapon nila ang kalibutanong pag-suplay sa lana sa tibuok kalibutan, lakip na dinhi ang nag-unang mga tambal gikan sa barato hangud sa pinakamahal gikan kini sa America ug Gran Britanya.
Wala man ta’y mga tambal nga gikan sa China, kay ultimo gani ang mga dulaan gikan sa ila nga nagkalat karon sa atong nasud, makahilo man di ba?
So, dili kinahanglan nga musangko sa gubat kon magmatigas kita batok sa America, gamay nga pagsaka sa presyo sa lana, magkulaps na ang atong ekonomiya, ug kon walay mga tambal nga ipadala dinhi, mokirig nata.
So, kinahanglang nato, isip-isip.