NAKABSAN sa kinabuhi ang acting municipal treasurer sa lungsod sa President Quirino, Sultan Kudarat atol sa pagpamanhig alas 5:50 sa hapon Sabado, Oktubre 19.
Giila ang napatay nga si Rey Torres, nagpuyo sa Barangay Katico, President Quirino, Sultan Kudarat.
Sa taho gikan sa Sultan Kudarat Police Provincial Office (SKPPO) nga samtang sakay ang biktima sa Isuzu Crosswind nga gipanag-iyahan sa LGU-President Quirino gikan sa Tacurong City pauli sa iyang balay apan pag-abot niini sa Purok 1, Barangay Tinaungan, kalit lang miabot ang upat ka wala mailhing tawo ug gipusil si Torres gamit ang kalibre .45 nga pistola.
Abtik sab nga miikyas ang mga suspetsado sakay sa duha ka motorsiklo paingon sa siyudad sa Tacurong.
Dead on the spot ang biktima nga nakaangkon ug daghang samad pinusilan sa nagkadaiyang parte sa iyang lawas.
Sa wala pa gipatay ang biktima, nagsulti kini sa iyang pamilya nga aduna kini nadawat nga hulga sa iyang kinabuhi gumikan sa iyang trabaho.
Dunay gidudahan na sab nga mga tawo ang mga kabanay sa biktima nga maoy suspek sa pagpusil-patay.
Sa kasamtangan, ang kapulisan sa President Quirino, Sultan Kudarat ang padayon nga nag-imbestiga sa insidente.