GITAY-OG na usab og linog ang probinsiya sa Cotabato alas 7:44 sa gabii sa Sabado, Oktubre 19.
Sigon sa taho sa Philippine Institute of Volcanology and Seismology (Phivolcs) Cotabato nga miigo ang 4.9 magnitude nga linog sa Tulunan, North Cotabato.
Tectonic in origin ang hinungdan sa pagtay-og sa yuta nga dunay gilawmon nga 29 kilometros.
Gawas sa lungsod sa Tulunan, nasinati sab ang pagtay-og sa yuta sa ubang dapit sa probinsiya sa Cotabato ug Kidapawan City.
Ang subling pagtay-og sa yuta maoy giingong aftershock sa 6.3 nga linog niadtong Miyerkules sa gabii, Oktubre 16 nga miigo sa Tulunan, North Cotabato.
Moabot na sa 553 ka mga aftershocks ang natala sa probinsiya sa Cotabato ug mga kasikbit nga dapit.
Misaka na sa pito ang patay sa linog ug nadugang niini ang duha ka tawo nga nadat-ugan sa ilang balay sa Alamada, North Cotabato.
Nagpasidaan si Department of Science and Technology Undersecretary Renato Solidum sa katawhan sa Mindanao nga igmaton ang kaugalingon, mag-amping ug dili magkompiyansa gumikan ang sunod-sunod nga aftershocks, senyales sa posibleng pag-igo sa mas kusog nga linog.