ANAA sa P7.5 milyones ang gisugyot nga budget ni Mayor Oscar Moreno alang sa tuig 2020 aron mapalapdan pa ang serbisyo sa katawhan sa dakbayan sa Cagayan de Oro.
Gibutyag ni Moreno nga kumbinasyon kini sa gigahing pundo diha sa social services, imprastraktura ug uban pa. Apan, ang pinakadakong pundo mao ang social services.
"Kumbinasyon man gud na social services. Kana mao gyud nay labing dako and then of course infrastructure. Dako sab ang atong infrastructure, but the social ssrvices would represent a good part of our budget," matud ni Moreno.
Nanghinaot usab si Moreno nga aprobahan sa konseho ang maong budget apan bukas usab kini kung dunay mga plano usab ang konseho ug kung duna silay buot usbon.
"Well, I hope nga mouban sila. Now of course, di man nato madiktahan ang City Council. No, I'm open to whatever plans also they might have," dugang pa.
Giingong nagpakita lamang kini nga dunay demokrasiya sa pamunoan niini ilabi na diha sa pagplano sa pundo alang sa katawhan sa dakbayan.
Tanan usab nga mga departamento ang gipatas-an ang pundo aron nga mas mapalapdan pa ang serbisyo ngadto sa katawhan.
Gipaniguro usab niini nga walay pagsaka sa koleksiyon sa buhis sa mga negosyante ug pangitaan og paagi aron nga mahatag ang maayong serbisyo.
P500M ipautang sa water district
Gibutyag usab ni Moreno nga tanan gipatas-an ang gigahing pundo ug dunay bag-ong item nga mao ang pundo alang sa Cagayan de Oro Water District (COWD) alang sa panubig sa mga hinterland barangays sa dakbayan sa Cagayan de Oro.
Tipik sa gisugyot nga pundo sa sunod tuig mao ang P500 milyones nga tabang alang sa COWD.
"Apil niana is the amount of P500 million. Kana we intend to provide para atong gamiton pag tabang sa water district para ang mga infrastructure project mahimo nila, para mahatod ang tubig sa Balubal ug Indahag, ug uban pa nga mga barangay," matud ni Moreno.
Giklaro ni Moreno nga kining maong pundo mabawi kini sa pila ka mga tuig ug dili lang bastang ihatag sa water district.
"Kani lang ang sa P500 million wala na before. That's a new item pero dili na ingon na non-recoverable. Recoverable also from the water district pero after a period of time," dugang pa.
Giingong tabang pinansyal kini sa lokal nga kagamhanan ngadto sa maong buhatan aron hingpit na nga mahatagan og panubig ang mga barangay nga naglisod ilabi na sa panginahanglanon sa tubig.