BUSOG ang mga empleyado sa kapitolyo probinsyal, mga Kuyamis Beauty queens, mga sakop sa prensa, ug mga personahe sa asosasyon sa hog raiser sa Northern Mindanao human 25 ka baboy ang giihaw aron ipaabot nga luwas ang mga baboy sa African Swine Fever (ASF) sa Misamis Oriental.
Sa maong gidaghanon, moabot ngadto sa 23 ang gilitson, ang laing duha gi barbecue ug ghumba, samtang ang mga lamang loob gihalang-halang.
Matud ni Dr. Benjamin Resma, Provincial Veterinary Officer, nga usa ang Misamis Oriental sa top producer sa baboy paingon sa lain-laing lugar sa Pilipinas.
Matud niini nga makapagawas og prudokto ang lalawigan ug makasuplay paingon sa laing dapit, apan nagdili sa mga prudokto gikan sa Luzon nga moabot sa lalawigan.
Kini human una na nga nagpagawas og kamandoan si Misamis Oriental Governor Bambi Emano nga babagan ang bisan unsang prudokto sa baboy lakip mga pasalubong nga makasulod sa Misamis Oriental.
Dili bout niining mataptan sa maong sakit ang mga binuhing baboy sa mga hog raisers sa lalawigan kay dako og kadaot kini sa ilang negosyo ug magkulang pa sa suplay.
Matud ni Resma, ang pagpakaon sa 23 ka litson baboy gihatag sa asosasyon sa hog raisers sa Northern Mindanao aron ipaabot sa katawhan sa lalawigan ug sa tibouk nasod nga luwas kaunon ang baboy, ug walay ASF nga sakit nga natala dinhi sa dapit.
Dili lang mga empleyado sa kapitolyo ang lakip sa nabusog, apan lakip ang mga outsider, mga galatagaw sa kadalanan ang nakakaon sa boodle fight, ug naka bring-home pa.