"DILI nalang ko motumpang, kay nasuya raman tingali na sila sa atong maayong lakaw sa kapitolyo."
Kini ang gibalik-balik nga pahayag ni Misamis Oriental Governor Bambi Emano human giulan og batikos ug pangatake nga gitouhang pamolitika.
Nagsugod ang isyu paghagit sa road clearing operation team sa local nga kagamhanan sa Cagayan de Oro alang sa pag-cleared sa mga nakababag nga estraktura sa dapit.
Aoan gihingusgan ni Emano ang pagbabag niini tungod kay sakop man kini sa compound sa Kapitolyo nga sya lamang ang dunay katungod.
Gipangita sab sa City Hall ang building permit sa bag-o lang giinagurahan nga Tourism Building sa Capitol Park.
Nasundan dayon kini sa giingong kasabutan tali ni Emano ug usa ka renter nga giingong walay gipaagi sa Sangguniang Panlalawigan (SP) nga maoy nag-manage karon sa mga stall holder sa Kapitolyo nga gitawag nga rason nganong hugot iyang pagprotehir sa mga mamaligyaay.
Gibatikos usab si Emano ni Board Member Jerry Khu sa pagtukod niini sa extension office sa lungsod sa Tagoloan ug nganong dili didto sa pinakapobre nga mga lungsod.
Lakip sa gikwestyon ni Khu, nganong wala pa giabrihan ang Capitol Park nga nakabalda sa pag-walking sa katawhan sa nga buot magpahayahay sa parke.
Si Board Member Jessa Mugot nikwestyon usab sa transparensya ni Emano.
Ug ning bag-o lang gikwestyon sa National Historical Commission of the Philippines (NHCP) ang pagkanta og bisaya sa lalawigan sa Lupang Hinirang imbes nga Tagalog.
Nakalatid sa balaod nga pwedeng itudlo sa pinulongan ang Lupang Hinirang apan di pwede kantahon.
Nagpaabot sab si Mayor Oscar Moreno ning bag-o nga walay nahimo sa lalawigan si Emano gikan sa serbisyo sa panglawas, inprastruktura ug uban pa.
Uwahing interbyu sa SunStar Superbalita kang Emano gibutyag niini nga moabot ra ang panahon nga iya kining usa-usahon og tubag nga isyu.
Dugang niini nga mayor pa lamang siya sa lungsod sa Tagoloan hangtod nahimong kongresista, naanad na siya sa batikos gikan sa iyang mga kaatbang sa pulitika.
Nagtuo kining nasuya lamang ang iyang mga kritiko sa mga naabtan karon sa lalawigan, labi na nga sunod-sunod ang iyang pagharbat sa mga award sama sa first runner-up sa Best Provincial Tourism Oriented Province.
Lakip sab ang lalawigan sa most business-friendly nga probinsya ngadto sa mga investors.
Dugang ni Emano nga sa iyang pamunoan, naila ang Misamis Oriental sa tibouk Pilipinas tungod sa iyang paningkamot sukwahi kaniadto mga mahadlok ang mga turista.
Sa iyang bahin ni Board Member Buboy Sabal atol sa privilege speech niini sa sesyon sa SP, gibutyag niini nga undangon na unta sa pipila ang pagbatikos sa gobernador kini tungod kay tulo na ka termino kining gipili sa katawhan sa lalawigan nagpasabot lamang nga saludo ang katawhan sa gipakitang kataraong sa pagpanerbisyo niini.
Atimanon ang CDEO
Samtang si Carlo Dugaduga, ang Information Officer sa Kapitolyo probinsyal, mibutyag sa SunStar Superbalita nga maningkamot na lamang unta ang dakbayan sa pag-atiman sa kakulangan ug dili na manghilabot sa lalawigan.
"Na busy sila ug plano unsaon pag Guba si Governor Bambi Emano. Hasta ang National Anthem gipatulan. Bisag unsa na lang nga mudslinging and character assassination. All for political posturing." matud ni Dugaduga.
"Wala kalimti ni Governor Bambi ang iyang obligasyon. Iyahay tag trabaho kay lain lain man tag gi alagaran," dugang niini ug miingon nga kung duna man mga butang nga nataligam-an ang gobernador, kini ra mismo ang manubag sa mga katawhan sa lalawigan.”
Giklaro sab niini nga wala nanghilabot sa dakbayan si Emano.
"Tungod sa ilang sige ug pangaway ug sige’g pangatake, nalimut na hinuon sila nga nagkatag na diay ang fecal coliform sa Cagayan de Oro river apil ang kadagatan sa Barangay Bonbon,” pahayag ni Dugaduga.
“Unsa may ilang gi buhat aron mabalik ang ka Limpyu sa Tubig? Naguba ang computer sa police station kay nagbusagak ang tubig ulan gikan sa atop nga arang dagkua ug buslot. City council gi kawatan ug mga computer monitors. Pag-apaw sa tubig sa kalsada inig bunok sa ulan, dili tiaw-tiaw nga problema sa trapiko. Naa pay tulis diin dali nga gibasol sa City hall ang kaluya sa kapulisan," dugang niini.
Pahimangno ni Dugaduga sa kagamhanan sa dakbayan unta nga tul-iron sa ang hiwi, ninduton ang bati, Limpyuhan ang hugaw, han-ayon ang siyudad usa mangatake ug manaway.