Barangay kagawad sikop sa PDEA

TIKLO ang usa ka Barangay Kagawad sa gipahigayong pagpangronda sa Philippine Drug Enforcement Agency (PDEA-10) niadtong adlaw nga Biyernes, Oktubre 18, sa Barangay Iponan, dakbayan sa Cagayan de Oro.

Sikop si Kagawad Redem Dablio, 55, ulitawo, residente sa maong dapit ug aktibong Kagawad sa maong barangay.

Sa impormasiyon nga nahipos gikan sa tinugyanan sa PDEA-10, nasayran nga anaa sa 11 ka pakete sa gitoohang shabu ang nakumpiska nga anaa sa mga unom ka gramo ang gimbug-aton. Dunay gibanabanang kantidad nga P40,800.

Samtang sa pahayag ni Regional Director Wilkins Villanueva sa PDEA-10 nga nakita sa katawhan sa maong dapit si Redeem nga maayong tawo apan ang paggamit sa ilegal nga druga, paghimong drug den sa panimalay niini, pag-finance ug pagproteher sa mga indibidwal nga naadik sa maong butang mao ang pinaka dakong sayop nga nahimo niini dili lang sa gobyerno apan lakip na sa katawhan nga nibotar kaniya.

"Using dangerous drugs, using his house as drug den, financing, and protecting people who proliferate dangerous drugs in his barangay is the worst offense that he can do, not only against the government but to the very people who elected him. Let us not politicise this particular operation. WALANG PULITIKA SA DROGA!," ingon sa post niini.

Gipanghimakak usab ni Dablio nga iyaha ang maong ubay-ubay ka mga pakete sa shabu nga nakuha sulod sa iyang panimalay ug gipamugos nga gitamnan sa mga otoridad.

Gipasaka na ang tukmang kaso batok sa maong Kagawad.