UPAT ang patay, lima ang nasikop ug wa pa matino ang gidaghanon sa mga tulisan nga nakaikyas human ning-ataki sa jewelry stores ug money changer sa JCenter Mall sa dalan A.S Fortuna, siyudad sa Mandaue niadtong Sabado sa gabii, Oktubre 19.
Giingong kapin sa P130 milyones ang balor sa maong mga alahas ug kwarta ang nakuha sa mga tulisan. Apan, wala pay opisyal nga pamahayag ang upat ka establisamento nga nabiktima sa tulis.
Ang mga namatay mao silang Kevin Plaza Andales, 25, ulitawo; Wilfredo Suerte Enguito, 47, nga pulos taga Barangay Lorenzo Tan, Tangub City, Misamis Occidental; Philip Faburada, trabahante sa Master Lambert Trucking Services nga taga dan Banahaw, Balut, Tondo, Manila ug DC Glen Gilberto Tairos, 47, taga Barangay Lawaan, siyudad sa Talisay, Cebu.
Samtang ang lima nga buhi mao silang Roel Nano Sumingit, 35, taga Tangub City; Jun Batanguso Candelaria, 38, taga Naga City, Bicol; Julivyn Lumingkit Quirante, 43, taga Tangub City; Arnel Sumingit Cimafranca, 38, samaran, taga Tangub City; ug James Anthony Gamaya Gomez alyas “Maky,” 44, taga Catadman Acasia, Ozamis City, Misamis Occidental.
Si Gomez nasikop sa mga police nga nag-check point sa lungsod sa Sogod sa dihang gipangayoan nig lisensya diin nasuta nga taga Ozamis nga giingong moadto sa Polambato sa Bogo.
Nakig-alayon dayon ang Sogod Police sa Bogo ug nakompirmar nga ang mga kauban ni Gomez nadakpan na.
Nakuha sa mga dinakpan ang usa ka Toyota Innova nga adunay plate number ZRM 489 ug tulo ka motorsiklo lakip na ang mga armas nga calibre .38 ug kwarta nga mobalor sa P345,000.
Pasado alas 7 sa gabii, nakurat ang mga mamalitay sa JCenter Mall sa dihang kalit lang nga gipangmartilyo ang estante sa usa ka pawnshop sa mall ug gipangkuha ang mga alahas niini dungan usab sa pagtulis sa usa ka money changer.
Pipila ka minutos lang nanibat ang mga suspek nga gibana-bana sa kapulisan nga moabot ngadto sa napulo ngadto sa 16 ka mga lalake.
Sa kuha sa closed-circuit television (CCTV) camera sa mall makita nga nanakay matod pa kini sa usa ka sakyanan, samtang ang uban nagsakay sa motorsiklo nga maoy hinungdan ngaa gipaalarma kini sa tanang units sa Philippine National Police sa Central Visayas.
Matod ni Police Colonel Jonathan Abella, hepe sa Mandaue City Police Office, nga human sa alarma sa tulis sa mall nagpatabang dayon sila sa silingang police stations sa probinsya sa Sugbo nga mo lusad og checkpoint aron madakpan ang mga tulisan.
Miabag na usab ang Regional Special Operations Task Group (RSOTG) 7 sa pagtawag sa tanang police stations sa probinsya ug sa silingang mga dakbayan nga mag-alerto ug atngan ang mga suspek.
Gihatag ang tanang paghulagway sa mga suspek lakip na ang dala niini nga sakyanan nga maoy getaway vehicle ngadto sa mga police station.
Pagka alas 11:15 sa Sabado sa gabii, Oktubre 19, sa Barangay Polambato, dakbayan sa Bogo, diin naa nahimutang ang pantalan nga mopaingon sa Masbate, nakabantay si Police Staff Sergeant Jojit Potot sa Toyota Innova nga adunay plate number ZRM 489 ug tulo ka motorsiklo nga maoy gipahibawo sa RSOTG-7.
Nakita usab niya nga kadudahan na ang mga sakay niini. Dali niya kini nga gidakop, diin usa niini samdan.
Gipahibawo dayon sa Bogo City Police Station ang Philippine Coast Guard (PCG) sa San Remegio labot sa mga suspek nga sakay sa MV Maria Helena sa Polambato Port diin gituohan nga aduna pa kini sakay nga mga suspek.
Dali nga nangabot ang mga sakop sa PCG sa alas 11:35 sa gabii ug nihimo dayon silag inspection sa sulod sa barko nga niresulta sa pagkasikop sa upat ug lain pang tulo nga gi-turn-over usab dayon nila sa mga pulis sa dakbayan sa Bogo.
Apan sa dihang paingon nang dalhon ang mga suspek sa police station uban ang mga personnel sa RSOTG 7, tulo niini ang nangilog sa armas ug moikyas na unta.
Tungod sa maong sitwasyon, usa sa mga pulis ang nikuha sa iyang armas ug gipamusil silang Andales, Enguito ug Faburada nga niresulta sa ilang kamatayon.
Samtang si Glen Gilberto Tairos sa dihang gisita sa usa ka pulis mikuha matod pa kini sa iyang armas ug nagpabuto apan, giingong wala maka igo nga maoy hinungdan nga gipusil usab kini sa pulis.
Matod ni Police Lieutenant Colonel Emily Santos, hepe sa Bogo City Police Station, nga wala na nila makuha ang mga alahas nga natulis sa mga suspek tungod kay gidala matod pa kini sa lain nilang mga kauban.
“Wala sila motug-an asa ang alahas kay gisulod daw nig usa ka bag unya naa may isa ka bag gud nga gikuha from them. Unya gisakay atong usa ka sakyanan nga wala namo ma-trace asa paingun ba. Pero disseminated nato ang color sa sakyanan,” butyag ni Santos.
Sa pamahayag sa mga nadakpan, kapin usa ka semana na sila nga nag-abang og lodging house atbang sa mall aron magpaabot kanus-a nila tulison ang pawnshop ug ang money changer.
Alas 6 palang sa buntag niadtong Sabado, gisulod na sa mga suspek ang duha ka motorsiklo sa basement parking sa mall ug mibalik kini pagka udto.
Matod ni Colonel Abella nga nagsuroy-suroy pa sa sulod ang mga suspek sa wala pa sila manulis.
Sa dihang human sa pagpanulis dali nga nanagan ang mga suspek sa basement diin nahimutang ang ilang sakyanan ug misibat kini palayo.
“Ang motor sayo kaayo gisulod mga alas 6 sa buntag kay ang ibabaw call center so gibilin ang motor pagka alas 11 mibalik nag tan-aw tan-aw pagka alas 7 na mao nato nanulis na.” Matod ni Police Colonel Jonathan Abella.
Samtang nakuha na usab sa mga sakop sa Cebu Provincial Police Office ang laing sakyanan nga gituohan nga maoy gisakyan sa mga kauban sa nanulis sa JCenter mall nga nagdala sa mga alahas.
Gibilin kini sa usa ka dapit sa lungsod sa Liloan ug wala na makit-i ang sakay niini nga gituohan nga mibalhin sa laing sakyananan.
Si Abella miangkon nga niadtong miaging semana naka dawat na silag intelligence report nga adunay nangabot sa ilang dakbayan nga mga Ozamis boys nga nag plano nga manulis sa dakong establisamento.
Tungod sa maong impormasyon gisaka nila ang alert status sa pagtuo nga sunod semana pa kini mangigo.