WA DAMHA nga nakasakay ko sa modernong jeep sa miaging semana. Diha koy importanting lakaw mao nga nangita ko masakyan padung sa eskina Cabangcalan agi sa Barangay Talamban, Cebu City.
Sa dalan Colon ko nanukad nga maoy naandan nakong huwatanan og PUJ niadtong panahon nga sa Talamban pa ko nagpuyo. Padung na unta kong mosakay sa nagparada nga dyip. Kalit lang niabot ang modernong jeep mao nga nakahukom ko nga akong suwayan sa unang higayon. Mao ni ang akong naobserbahan.
Daghan na ang naanad sa pagsakay ilabi na ang mga tinun-an nga nagtungha sa dakong unibersidad sa Talamban. Nabatian nako sa akong mga kasakay nga sukad nisud ang modernong jeep sa maong ruta ilaha na kining giatngan. Ang rason bugnaw og hamugaway.
Sa kainit sa panahon sa gawas kinsa man guy di ganahan mosakay og bugnaw nga sakyanan. Mao ni ang dakong bintaha nga naka paapiki sa daghang drayber sa PUJ. Bisan kinsa nga drayber sa maong ruta ang imong pangitan-on nakibhangan gyud ang ilang kinitaan kay sa modernong jeep naman nanakay ang uban.
Pananglit sa ruta sa Guadalupe nitug-an nako si Josephus Solomon, drayber sa PUJ gikan pa niadtong 1985, sukad nga nisud ang modernong jeep sa ilang ruta nigamay ang iyang kinitaan. Matod niya, sayon ra kaayong tigumon kaniadto ang otso sentos ka pesos ngadto sa usa ka libo ka pisos nga kita matag adlaw.
Karon kinyentos pisos nalang ang iyang madaginot. Samot na kon duna pay daghang modernong jeep ang mosud sa maong ruta. Unya asa naman unya padung ang susama ni Josephus kon mamuwak na ang tanang ruta sa mga modernong jeep. Samtang gibati og kahayahay ang mga sumasakay may mga tiyan nga nagkutoy tungod sa kagamay sa kinitaan.
Sagdi nalang si Josephus ug kaubanan kay anad na sila sa gubat sa kawad-on. Ang ilang pamilya. Ang ilang mga anak nga nag-eskwela. Unsaon naman lang. Gusto kong mamati sa gobiyerno unsay ilang programa alang ning sektor sa mga PUJ driver nga apektado sa operasyon sa modernong jeep.
Sa giingon ko na, samtang gihangop natong sumasakay ang kaharuhay sa biyahe pinaagi sa modernong jeep, di sab makatarunganon nga way programa nga buhaton pagsagang sa epekto ning dakong kausaban sa panakayan sa kadalanan. Nagtuo ko nga bisan adlaw adlawon pa og rally sa mga drayber ang pagsupak sa phaseout sa mga PUJ lisod na ning mapugngan.
Ang ako lang nga ang gobyerno di makalimot sa dakong kontribusyon sa mga PUJ driver pagpalihok sa atong ekonomiya pinaagi sa paghakot sa minilyon ka pasahero niadtong mga tuig nga wa pa kining modernong paagi sa pagpamasahero.