USA ka tawo nag-hire og usa ka water diviner aron pagpangita og tinubdan sa tubig nga iyang ugbukan og puso artesiano. Gigamit sa water diviner ang iyang kahimanan nga morag duwaan sa bata – duha ka piniko nga metal.
Tuod man, pag-abot sa usa ka dapit, kalit nga nihagtik ang duha ka metal, timailhan nga dunay tubig. Gipakawot ang maong dapit. Wa pa moabot ang giladmon og usa ka metro, nakawtan nila ang main pipe sa Metropolitan Cebu Water District (MCWD). Kusog pa niadto ang pressure sa tubig sa MCWD. Kon karon pa to, di na molihok ang kahimanan sa water diviner. Gani, ang ubang mga konsumidor sa MCWD magtukaw sa tungang gabii kay maghuwat nga moagas ang ilang gripo.
***
Naglisod ang mga opisyal sa MCWD pagtubag sa pangutana nganong wa nila masulbad ang kakuwang sa tubig. Dugay na silang nahibawo sa kadaghan sa ilang mga konsumidor, sa gidaghanon sa tubig nga gikinahanglan, apan wa sila maka-supply niini.
Ang MCWD usa ka independente nga water district. Apan ang mga sakop sa hunta direktiba niini tinudlo sa mayor sa siyudad sa Sugbo. Sanglit wa sila makasulbad sa krisis sa tubig, angayan lang nga hulipan sila bisan pa kon wa pa mapupos ang ilang mga termino. Mao kini ang gibuhat ni Cebu City Mayor Edgardo Labella– ang pagputol sa serbisyo sa lima ka board of directors sa MCWD sugod sa Oktubre 15, 2019. Sama sa mga konsumidor sa MCWD, kon di makabayad, putlan sa koneksyon sa tubig. Kana kon dunay tubig.
***
Apan nagdumili sa pagkanaog sa puwesto ang lima: sila si chairman Joel Mari Yu, vice-chairman Atty. Ralph Sevilla, kanhi Cebu City councilors Augustus Pe Jr. ug Atty. Procopio Fernandez ug Atty. Cecile Adlawan.
Sa ubang mga nasod, ang mga opisyal mapakyas sa ilang mga tahas, awtomatik nga moluwat sa katungdanan tungod sa kauwaw. Nakahibawo ba kaha ni sila nga usahay mas kusog pa ang sirit sa ihi kay sa agas sa mga gripo sa MCWD? Maayo sab tan-awon kon di ba mga bottled water ang gipang-inom ining mga sakop sa hunta direktiba sa MCWD. Kay kon mao kana, wa silay kalibotan nga tungod sa krisis sa tubig, nag-agwanta na lang intawon ang uban sa pag-inom og beer.