CSCR center island palig-unon

CENTER island sa Cebu South Coastal Road (CSCR) butangan og babag aron sakyanan nga madisgrasya dili molahos sa pikas lane.

Panagang kini kon ugaling aduna na usab mahitabo nga disgrasya diha sa SRP.

Kini maoy gipahibawo sa pangulo sa City of Talisay Traffic Operations Development Authority (CT-TODA) Jonathan Tumulak.

Kini human sa mga sunod-sunod nga vehicular accident nga nahitabo sa CSCR. Sa miaging semana lang, usa ka motorista ang patay human nga niambak sa center island ug nitipas sa pikas lane ang usa ka auto.

Matod ni Tumulak, iya nang gipakig-estoryaan ang taga Department of Public Works and Highways (DPWH) Second Engineering District sa iyang suhistiyon.

Kay ila man sa DPWH ang pagpalambo sa center island.

Una niyang suhistiyon mao ang pagpintal sa center island nga maklaro sa motorista.

Ikaduha, mao ang pagbutang og directoral sign nga reflectorized aron ang motorista mahibawo sa karsada nga ilang gisubay.

Ikatulo, mao ang paghimo gyud og guard rails aron kon ang disgrasya motumaw dili na motipas ang sakyanan sa pikas lane.

Laing suhistiyon ni Tumulak mao ang pagbutang og rumble strips.

Nanghinaot si Tumulak nga unta mapadali kini sa pag-aksyon ug pagtrabaho sa DPWH aron kalikayan pa ang susamang disgrasya. (FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph