ADUNAY lahugay nga ipatuman ang Traffic Management Coordinating Committee (TMCC) sa mga division head sa Cebu City Transportation Office (CCTO) sa mosunod nga mga adlaw.
Kini ang gibutyag ni City Attorney Rey Gealon, chairman sa TMCC, nga maoy giumol ni Mayor Edgardo Labella para motabang sa pagdumala sa CCTO.
“Expect revamp of personnel in the different divisions of CCTO to make them effective and efficient in the performance of their respective functions,” padayag ni Gealon.
Kagahapon, Oktubre 20, gitagbo ni Labella ang dul-an 700 ka mga sakop sa CCTO nga gilangkuban sa mga traffic enforcer, parking aide, office staff ug uban nga naglakip sa mga job order (JOs).
Gipatawag ni Labella ang mga sakop sa CCTO ug gipasaligan nga makapadayon sila og trabaho kon likayan ang korapsyon. Apan, gipadayag niya kon ilang sudlan ang pagpangilkil, diha dayon iyang tangtangon sa serbisyo ug pasakaan og tukmang kaso.
Positibo ang tubag sa gatusan ka mga kawani ug nipadayag sa ilang suporta sa administrasyon ni Labella ug dayon silang tanan namahaw pinaagi sa boodle fight.
Ang mayor nidugang nga sunod niyang tagbuon mao ang mga empleyado sa Department of Public Services, Department of Engineering and Public Works, Department of General Services ug uban pa. Apan, dili niya dunganon gumikan sa kadaghan sa mga kawani. Iya ipahinumdom kanila ang maayong pagserbisyo ngadto sa publiko. (PAC)