NABALIK na ang usa sa upat ka mga Children In Conflict with the Law (CICL)nga padayon pang gipangita kinsa nieskapo gikan sa Cebu City Operation Second Chance (CCOSC) kapin duha na ka semana ang nakalabay.
Kini ang gibutyag ni Ambrocio Ibones, pangulo sa CCOSC , human ilang nasikop sa miaging adlaw ang usa ka menor de edad nga taga Barangay Banilad, apan didto na nila nakuha sa lungsod sa Balamban.
Si Ibones nagkanayon nga ilang isunod og kuha ang laing CICL nga gikan sa lungsod sa Consolacion, Barangay San Roque sa Cebu City ug Mantalungon sa lungsod sa Barili.
Si Mayor Edgardo Labella nihatag og lugway ni Ibones aron mabalik ang mga nieskapo.
Ang pangulo sa CCOSC nagkanayon nga wala nila madali ang pagpabalik sa mga CICL sanglit kuwang sila og mga personnel nga maoy makaadto sa ilang tagsatagsa ka mga lugar nga nahimutangan.
Si Labella nagkanayon nga kon dili mobalik ang mga CICL, mahimo kining dugang nga kaso nga ilang atubangon gawas sa ilang mga kaso nga kasamtangang giatubang.
Niadtong Oktubre 4, 11 ka mga CICL ang hingpit nga nakaeskapo gikan sa dul-an sa 30 ka menor de edad nga nisuway og sibat gikan sa pasilidad. Apan sa 11, dali rang nadakpan og balik ang pito.
Samtang gihimo usa ang imbestigasyon bahin sa pasilidad tungod sa reklamo sa mga bata nga subra ra kaestrikto. Apan, gihimakak kini sa mga kawani.
Ang naasoy nga pasilidad mao ang gitahasan sa pag-rehabilitate sa mga bata nga nakalapas sa balaud human dili kini mahimo nga itapon sa mga hamtong nga bilanggoan, subay sa Juvenile Justice and Welfare Act. (PAC)