GIPAKITA ni Karen Manayon kon nganong nahisakop siya sa national triathlon team sa iyang pagdaog sa National Age Group Triathlon (NAGT) 2019 kagahapon sa City of Naga.
Ang sakop sa Cebu City Rider Omega Pro Tri Team maoy miangkon sa women’s overall title human siya mitali og duha ka mga oras, 44 ka mga minutos ug 17 ka mga segundos sa paghuman sa 1.5-kilometer swim, 40K bike ug 10K run nga lumba.
Ang laing sakop sa Rider Omega team nga si Cianyl Jamae Gonzales maoy miangkon sa ikaduhang dapit pinaagi sa oras nga 2:52:59 samtang ikatulo si Marie Flor Justiniane sa Go4Less Tri Team, kinsa adunay oras nga 3:14.36.
Si Manayon, 16, sa Talisay City nahilakip sa reserve list sa national team nga mokombati sa 30th Southeast Asian (Sea) Games nga ipahigayon sa Pilipinas sugod karong Nobiyembre 30.
Gipasabot ni Manayon nga bisan wala pa’y kaseguroan kon makasalmot siya sa SEA Games apan kanunay siyang andam kon tawagon aron morepresentar sa nasod.
Dobleng kampiyunato ang naangkon sa Rider Omega gumikan kay naghari sab ang lain nilang miyembro nga si Jonathan Pagaura sa men’s division pinaagi sa oras nga 2:14:27.
Nagsunod kang Pagaura mao sila si Asian elites Jorry Ycong (2:16:16) ug Banjo Norte(2:16:35).
Ang ubang mga ningdaog mao sila si Joshua Sebastian Cabusas sa men’s super sprint race, Marielle Estreba sa women’s super sprint, Rider Omega sa Standard Club Race, sila si Antonne Carlo Villahermosa, Ramonito Espinosa ug Eric Chepsiror sa men’s relay. (RSC, ESL)