NINGBANGON gikan sa 10 ka mga puntos nga pagkalubong sa 4th quarter ang University of Southern Philippines Foundation (USPF) Baby Panthers aron pakuratan ang Sacred Heart School-Ateneo de Cebu (SHS-AdC) Magis Eagles, 84-80, kagahapon, Oktubre 20, sa 2019 Cebu Schools Athletic Foundation, Inc. (CESAFI) high school basketball tournament nga gipahigayon sa Cebu Coliseum.
Gidagkutan ni Christopher Isabelo ang pagbangon sa Baby Panthers pinaagi sa iyang duha ka three-point shots unya gitiwas nila ni Jack Suello ug Kyle Ochavo ang pag-agak sa Baby Panthers pinaagi sa ilang krusyal nga mga puntos.
Sa kadaugan, ning-amag ang poruhan sa Baby Panthers alang sa sunod round ug mingsaka sila sa 7-2 nga rekord samtang ang Magis Eagles ningsukarap sa 4-2 nga baraha.
Gipangulohan ni Isabelo ang kadaugan pinaagi sa iyang 20 puntos. Nidugang og 17 puntos si Ochavo, niamot og 13 puntos si Elian Yap ug 11 puntos si Elijah Singson.
Ang Magis Eagles gipangulohan nila ni LA Casinillo ug Raffy Celis pinaagi sa ilang 16 puntos matag usa.
Sa laing duwa sa high school division, pagbangon sa University of San Jose-Recoletos (USJ-R) Baby Jaguars gikan sa mangil-ad nga pagsugod sa season ug ningposte na sab sila’g laing kadaugan. Gipangmakmak sa Baby Jaguars ang Don Bosco Technological Center (DBTC) Greywolves, 79-64.
Mao kini ang ikatulong sunodsunod nga kadaugan sa Baby Jaguars human nila sugdi ang season og upat ka mga kapildihan. Ang Greywolves nangahagbong sa 4-4 nga baraha. (ESL)