HAPIT na motangkod nga usa ka tuig gikan sa gipahigayong groundbreaking sa Cebu City Skate Park nga anha tukoron sa Fort San Pedro, apan hangtod karon wa ma gyud kini masugdi.
Karon nga ang National Skateboarders Association mipadala na og sulat ngadto sa Cebu City Council, ang buhatan sa City Legal Office mi-review na kon nganong hangtod karon nganong ang gisaad nga Skate Park sa miaging administration wa ma gyud mapatuman.
Niini, si City Attorney Rey Gealon ang misusi ug mi-request na karon sa City Treasurer og certification of the receipt o non-receipt ang dakbayan kalabot sa P5 million donation ni Maria Victoria “Minnie” Osmeña, ang igsuon ni kanhi Cebu City mayor Tomas Osmeña.
Kon kahinumdoman ang siyudad misulod og memorandum og agreement (MOA) ni Minnie alang sa pagtukod og skate park ug sa higayon nga kini mahingpit na, iya gilayon kining i-turn over sa siyudad.
Apan tungod kay moabot man ang gastuhan niini og P12 million, ang dakbayan maoy moabaga sa P7 million.
Sa ilang suwat, ang mga sakop sa maong asosasyon misugyot sa siyudad nga kon mahimo ang Suba Gymnasium mao na lang unta ang himuon nga indoor skate park sanglit minus man ang magasto niini kay sa orihinal nga plano.
Kon mahimo, dugang sa ilang sugyot, nga sa pagkakaron sementuhon lang una ang maong dapit aron didto lang una sila magpahanas sa ilang abilidad ug dili na sila sa mapugos sa pagpraktis sa mga kalsada diin sila gukdon sa mga pulis o mga personnel sa City Government.
Ilang gisaysay nga gidid-an na usab sila sa pagamit sa Plaza Independencia ug gani ang ilang mga gamit gipang-imbargo sa Prevention, Restoration, Order, Beautification and Enhancement (Probe) team.
Sa iyang text message, si Osmeña nagkanayon nga ang kasamtangang administrasyon maoy angay moabaga sa tanang gastohan gawas lang sa P5 million nga giangkon sa iyang igsuon.
Dugang ni Osmeña nga anaa ra kini ni Minnie kon mosugot ba siya o dili sa proposal sa asosasyon.
“If they want to build it somewhere else, that’s up to her to agree,” matod ni Tomas sa SunStar Cebu.
Miingon si Gealon nga ang dakbayan andam perming mogahin og pundo alang sa pagtukod sa pasilidad, kon u galing ma-turned over na ang maong kantidad.
“We hope that the P5 million will not remain a promise forever,” padayag ni Gealon kinsa mibutyag nga sa pagkakaron wala pa gyuy record nga dunay P5 million donation nga nadawat ang siyudad. (JJL, JBM)