DEAR Atty. Barrita,

Usa ako ka Pilipina nga naminyo og usa ka Amerikano. Nahimo na kong usa ka American citizen ug gusto kong mobalik sa Pilipinas.

Duna man gud akoy estorya nga nadunggan nga di makapalit og yuta sa Pilipinas ang mga langyaw. Ako nga usa ka Filipino citizen kaniadto, mahimo pa ba akong mopalit og yuta sa Pilipinas nga usa na man ako ka American citizen?

"The Manny Pacquiao Blog". Click here for stories and updates on the Filipino boxing champ.

Tagoa lang ako sa ngan nga Mrs. Jones. Manghinaot ko nga kahatagan ko nimo og katin-awan mahitungod sa akong pangutana.

Una sa tanan daghang salamat Mrs. Jones nga nibasa ka sa atong lindog bisan sa gilay-on sa imong gipuy-an.

Sakto ang imong nadunggan nga di makapalit ang mga langyaw og yuta sa Pilipinas subay sa atong Batakang-Balaod. Apan mahimo silang manag-iyag yuta pinaagi sa hereditary succession.

Ang makapanag-iyag yuta sa Pilipinas mao lang kadtong mga (1) Filipino citizens, (2) Filipino corporations and associations, (3) ang mga langyaw pinaagi sa hereditary succession ug (4) natural-born Filipino citizens nga nawad-an sa ilang Filipino citizenship, pero dunay mga limitasyon sa balaod.

Sa ato pa, ikaw nga usa ka kanhi Filipino citizen, mahimo nga makapang-iya ug klaruhon nato, makapalit og yuta sa Pilipinas, pero dunay mga limitasyon sa balaod.

Unsa man kining maong mga limitasyon?

Ubos sa Batas Pambansa (BP) 185 nga giluwatan niadtong 1982, makapalit ka og yuta para sa residensya kutob sa 1,000 square meters  ug usa ka ektarya kon gamiton para sa agrikultura.

Ubos sa Republic Act (RA) 8179 nga nag-amendar sa Foreign Investment Act of 1991, kon ang yuta gamiton alang sa negusyo, makapalit kag kutob sa  5,000 square meters sa urban land ug kutob sa tulo (3) ka ektarya mga rural land.

Dunay balaod nga mahimo nimong kadangpan ug mao kini ang Republic Act 9225, ang Dual Citizenship Act of 2003.

Ubos ning maong balaod, ang mga kanhi natural-born Filipinos nga nangahimong naturalized citizens sa laing nasod, mahimong mo-apply og dual citizenship. Ubos sa dual citizenship, sama da nga wa sila kawad-i sa ilang Filipino citizenship, busa makapahimulos sila sa tanang mga katungod ug pribilihiyo sa usa ka Pilipino sa pagpanag-iyag yuta sa Pilipinas.Sa ato pa, way limitasyon sa gidak-on sa yuta nga iyang mapalit ug panag-iyahon.

Ang pagabuhaton mao ang pag-file og Petition for Dual Citizenship and Issuance of Identification Certificate (IC) pursuant to RA 9225 sa Bureau of Immigration (BI) ug sa pagkanselar sa imong alien certificate of registration.

Kadtong tua sa gawas sa Pilipinas mahimong modangop sa labing duol nga embahada o konsulado sa Pilipinas.

(Sa mga reaksyon kang Atty. Eddie O. Barrita: E-mail: edbarrita@yahoo.com; Cell # 09165805285; Room 201, 18 Cherry Court Bldg., Gen. Maxilom Ave., Cebu City)