DILI ikalimod nga grabe ang kahinam sa mga sumosunod sa National Basketball Association (NBA) nga makasaksi sa kamangtas sa dinuwaon sa 2019 No.1 rookie Zion Williamson sa New Orleans Pelicans.
Ang nakaapan lang kay dili pa makapakita og aksyon si Williamson sa labing unang duwa sa Pelicans sa 2019-20 regular season gumikan kay nakasinati kini og angol sa tuong tuhod sa pre-season ug wala pa’y tino kon kanus-a kini makaduwa’g sugod.
Ang kahinam sa mga sumosunod sa NBA sa pagsulod ni Williamson nahisama sa pag-abot ni LeBron James sa liga ubos sa kampo sa Cleveland Cavaliers niadtong 2003. Usa sab ka No.1 rookie pick si James.
Sa upat ka mga duwa sa pre-season, gipakita ni Williamson kon unsa ka dako ang iyang potensyal pinaagi sa pagrehistro og averages nga si 23.3 puntos, 6.5 rebounds ug 2.3 assists.
“He’s a monster,” paghulagway ni New York Knicks coach David Fizdale kang Williamson. “He’s a beast. He’s just going to continue to get better and better. We understand that kid is a heck of a player.”
Si Williamson usa ka 19 anyos nga adunay gitas-ong 6’7” ug gibug-aton nga 285 pounds.
Taliwala sa iyang gidak-on ug gibug-aton, grabe ka abtik si Williamson ug grabe sab kini molayat hinungdan nga adunay mga nabalaka sa iyang kondisyon.
Gibanabanang molanat pa og mga duha ka semana una hingpit maalim ang angol ni Williamson.
Mao kining klase sa angol nga nasinati ni Williamson dihang nabungkag ang iyang gisul-ob nga Nike nga sapatos atol sa usa sa iyang mga duwa sa kolehiyo.
Nabaniog og maayo kining maong hitabo nga maoy giingong hinungdan nga nahagsa og $1.1 billion pagkasunod adlaw ang stocks sa Nike.
Sa katakos ni Williamson, ang Pelicans wala magduhaduha sa pagpili kaniya isip No.1 overall pick ug pagbuhi kang All-Star Anthony Davis baylo sa sumosulbong nga mga magduduwa sa Los Angeles Lakers nga ilang gituohang ikatambayayong ni Williamson.
Sa hamubong panahon niyang pagduwa sa pre-season, giangkon ni Williamson nga mas grabe ka pisikal ang duwa sa NBA kumpara sa kolehiyo apan sa iyang tan-aw, dali ra siyang maka-adjust niini. (AP, ESL)