SA PAGKUYANAP sa makalilisang nga kagaw sa pangurakot sa atong nasud, halos nahurot na niini pagkagusbat ang halos tanang mga demokratikanhong institusyon sama sa Kongreso, mga departamento sa ehekutibo, Constitutional Commissions, judiciary ug bisan pa gani ang buhatan sa Ombudsman.

Hinungdan nga sa migawas nga bag-ong kalambuan nga gi-dismiss sa Sandiganbayan ang usa sa upat ka mga kasong napasaka nga may kalambigitan sa Asean Summit decorative lamp post, wala na nahibulong pa ang katawhan kay daan naman ganing kwestyunable ang kapakyas sa Ombudsman sa pag-apil kaso sa mismong Sekretaryo sa Department of Public Works and Highways nga si Hermogenes Ebdane og mao lama’y gilawog sa tirong ang mga mayukmok nga mga opisyal sa rehiyunal nga buhatan.

"The Manny Pacquiao Blog". Click here for stories and updates on the Filipino boxing champ.

Taliwala ning maong kapalpakan ang buhatan sa Visayas Ombudsman padayon nga nipasalig og nagahangyo sa katawhan nga sila atong suportahan, kay sila sa ilang buhatan padayon nga nagbuhat sa ilang gipanumpaang katungdanan.

Apan mabasol ba diay sa Ombudsman ang pagtuaw sa pagmahay sa mga Bisaya sa nakitang pagkatug sa mga reklamong ilang gisumbong sa Ombudsman ug sa mga kasong dayag na kaayo ang tinunto ug mga kabuang sama sa Deco lamps sa ASEAN Summit unya karon mabasura pa tungod sa huyang nga mga ebidensiya. Kini wa pay labot sa mga celebrated cases nga anaa nagtapun-og ning ilang opisina, unya wa na gyud atimana ug tagda.

Gamhanan unta kaayo ang buhatan sa Ombudsman, gani dili man mahimong hilabtan ang matudlo nga tanodbayan bisan pa sa appointing authority nga mao ang buhatan sa Presidenti kay impeachment da ang bugtong hinagiban sa iyang simbako, pag-abuso sa katungdanan. Sa pagukod sa isyu sa pangurakot, wala na gikinahanglana pa sa maong ahensya ang reklamo.

Kay siya da mismo ang mamhimong mopursigir sa pag-imbestigar kung adunay nangalisbong pangurakot sa bisan unsang ahensya ug transaksyun sa gobyerno.

Apan ambot ba og na-impatso ang Ombudsman nikagar man sa paghimo sa gitahas niini nga katungdanan dili lamang dinhi sa Kabisay-an kun dili sa lukop nasud gyud nga iyang geserbsiyuhan. Sa hudikatura, adunay panultihon: “justice delayed is justice denied”. Sa pagseguro unta nga mahatag ang hustisya sa mga magbubuhis kansang luha dugo ug singot maoy gipamuhunan sa paghatag og buhis sa gobiyerno ug aron usab mapakgang ang kagaw sa mga kawatan sa padayun nga pagkuyanap.

Mohimo si Mercidetas Gutierez ug mga pamaagi nga mapadali ang paghimug imbestigasyon, resolusyon ug desisyun sa Korte.

Aron diha sa pagsilot sa mga kurakot, mahibalik ang pagsalig sa mga Pilipino sa atong mga ahensya sa gobyerno.

Apan balitok gihapon ang gihimo sa kanahan kay gi-centralize naman hinuon ang pagpagawas sa tanang mga resolusyon sa tanang mga kasong gipa-ubos sa local nga imbestigasyon. Unya kini miresulta dili lamang sa di matukib nga kalangay. Angay na tang molihok ning maong epedimiya kay ang mismong doctor unta nga manambal, utro naman sang mi-enter!