NASIKOP ning siyam ka tawo, lakip na ang usa ka babaeng drug pusher, sa gihimong pagpangronda sa kapulisan sa Sitio Mananga 2, Barangay Tabunok, dakbayan sa Talisay niadtong Sabado sa gabii, Oktubre 19, 2019.
Ang maong operasyon na implimentar pasado alas 6 sa gabie miresulta sa pagkasikop ni Grethel Mercado, alyas Madam Grethel, 29 anyos, ug molopyo sa nahisgutang dapit.
Samtang ang laing walo ka mga nadakpan nga sila Joel Gabi, 40 anyos; Dax Mosqueda, 36 anyos; Cleo Sellona, 27 anyos: pulos molopyo sa lungsod sa Minglanilla; Alexander Mirasol, 49 anyos,molopyo sa Poblacion 1, dakbayan sa Carcar; Alfred Macalua, 19 anyos; Michael Alindajao, 31 anyos; Victor Basaslo, 35 anyos; pulos taga Barangay Lawaan 2 dakbayan sa Talisay; ug Balmer Linao, 40 anyos, nga taga Barangay South Poblacion, dakbayan sa Naga.
Kapin sa P200,000 nga balor sa gidudahang shabu ang nasakmit gikan sa mga suspetsado.
Matud pa ni Police Major Gerard Ace Pelare, ang hepe sa Talisay City Police Station, nga ang walo puros naabtan sa lugar nga mopalit samtang ang uban nasakpan nga nanggamit ug shabu.
Dugang pa ni Pelare nga ang ilang target nga si Mercado taud taud nang namonitor sa barangay sa iyang ilegal nga kalihukan nga makonsidera usab kini nga high value target.
Ang mga dinakpan anaa una gibalhog sa Talisay City Police Station.(BBT/FMD)