SUPERBALITA CEBU

Seguridad sa mall lugak: Pulis

Sa kaning tampo nga hulagway gikan sa usa ka mall goer sa J Centre Mall makita ang usa sa mga security guards sa maong mall nga nitan-aw sa mga nangabuak nga bildo gikan sa usa sa mga gitulis nga outlets niadtong Sabado, Oktubre 19, 2019. Karun ang maong guard ug mga kaubanan niya giapil na sa imbestigasyon sa Police Regional Office-Central Visayas kalabot sa ilang kalambigitan sa maong tulis. (Tampo hulagway gikan ni Tom Joshua Seno)

TANANG gwardiya sa J Centre mall nga duty niadtong Sabado, Oktubre 19, 2019 atol sa pagtulis sa pawnshops ug money changer, ipaubos sa imbestigasyon aron pagtino nganong nakalusot ang mga armas sulod sa mall.

Silang tanan gikonsiderar nga persons of interest samtang nagpadayon ang imbestigasyon.

Nabantayan ni Police Colonel Ildibrande Usana, deputy regional director for administration, nga nitumaw sa ilang imbestigasyon nga luag ra ang seguridad nga gipatuman sa mga security guard sa mall.

Buntag pa lang giingong naabot na sa mall ang mga tulisan, nga gibana-banang 14 ngadto sa 15 ka mga lalake. Bisan gani ang mga armas wa mabantayi.

Matod ni Usana nga makapaduda nganong wa babagi ang maong mga lalake nga kadudahan na ang ilang linihukan kon basehan ang kuha sa CCTV camera.

Naa na sa kustodiya sa Mandaue City Police Office ang kopya sa CCTV nga maoy mahimong giya unya sa imbestigasyon.

“At this point di pa tayo makapagbigay ng categorical answer kung ito po ay inside job. But for the meantime, the Mandaue City Police investigation is now considering yun pong mga private security personnel having been included dito po sa mga persons of interest,” matod ni Usana.

Gidayeg ni Usana ang mga pulis sa probinsya sa Sugbo nga dali nga nakadakop sa siyam ka giingong mga tulisan.

Ang siyam padung na unta molarga paingon sa lalawigan sa Masbate sakay sa barko sa pantalan sa Barangay Polambato, Siyudad sa Bogo, apan nabantayan sa mga pulis ang presensya sa walo.

Ang ikasiyam didto sa lungsod sa Sogod na-intercept sa mga pulis nga nag-checkpoint gihapon.

Giingong sila nagsabot nga sa Polambato mag-abot human sa malampuson nga pagtulis.

Namatikdan na sila sa pantalan pa lang daan.

Gipangita

Aduna pay laing mga kauban nga gipangita sa pagkakaron nga sakay sa usa ka blue nga Ford hatchback nga gibutyag sa mga tulisan nga maoy gisakyan sa mga nidala sa mga alahas ug kwarta nga wa pa gibutyag kon pila.

Giila ang upat ka mga suspek sa alyas nga Ryan, Tony Boy, Mark ug Ranger nga maoy ginganlan sa mga kauban niini nga naa sa kustodiya sa MCPO.

Nagtuo ang mga pulis nga ang mga suspek naa pa dinhi sa Sugbo taliwa sa hugot nga seguridad nga gipatuman.

Gipasabot ni Usana nga lehitimo ang gihimo sa mga pulis sa pag-neutralize sa mga suspek sa dihang misuway pag-ilog sa armas aron mosukol.

Nagpadayon pa usab ang PRO-7 sa ilang imbestigasyon kon nasunod ba sa mga pulis ang procedure sa pagdakop sa siyam nganong miresulta sa pagpamusil nga mikalas sa upat ka gikatahapang mga tulisan.

Adunay mga pangutana nganong nakailog pa kini bisan kon pinusasan ang duha ka mga kamot sa mga suspek sulod sa sakyanan sa Bogo police station.

“We assume that procedures have been followed,” matod ni Usana.

Iyang gihulagway ang mga tulisan nga makigpatay sa mga pulis sukad pa kaniadto tungod kay sakop sila sa mga organisadong tulisan nga nagbase sa Ozamis City.

Lider gitumbok

Samtang usa sa mga napatay nga tulisan giilang leader sa grupo ug kanhi sakop sa Alferez robbery group nga nagbase sa Ozamis City sa Mindanao.

Si DC Glen Gilberto Tairos, 47, taga Barangay Lawaan, Siyudad sa Talisay maoy gitudlo nga leader sa grupo nga sakop ni kaniadto sa usa ka dakong robbery group.

Siya ang gitumbok nga nagtulis sa Gaisano mall sa dakbayan sa Bacolod niadtong Agusto 2019 diin nakakuha sila og P4 million nga balor sa mga alahas ug malampuson nga nakasibat.

Usa sa mga dinakpan nitug-an sa tanan sa background ni Tairos ug nahibaw-an nga makadaghan na sila nakatulis.

“Some of them admitted their involvement in the Bacolod city Gaisano mall robbery incident,” matod ni Police Colonel Roderick Mariano.

Duha ka semana na ang nakalabay nakadawat og intelligence report ang Police Regional Office 7 nga nakasulod na sa Sugbo ang Ozamis robbery group ug giingong mitarget sa mga bangko ug pawnshops nga huyang ang siguridad.

Matod sa hepe sa Liloan police station, Police Major Danilo Colipano, nga lumad nga taga Ozamis si Tairos apan nagpuyo sa Talisay City ug Liloan, Cebu.

Siya ang gitumbok nga mitulis sa Palawan pawnshop sa lungsod sa Liloan diin nakakuha kinig P40,000.

Aduna usab kini giabangan nga apartment sa lungsod sa Consolacion nga maoy ilang tagoan human sa pagpanulis.

Makigtagbo

Mga mall owners, manager sa mga bangko, pawnshop ug security agencies pakigtagbuan sa kagamhanan sa syudad sa Talisay, karong adlaw, Oktubre 22.

Himuon kini sa hapon, sa buhatan sa mayor aron pagtuki kalabot sa mga giandam na nga precaution aron kapugngan ang mga susama nga krimen.

Buot usab nga sayran ni Mayor Gerald Anthony Gullas Jr. ug ni Police Major Gerard Pelare ang pagpahugot sa seguridad sa mga mall ug uban pa nga business establishment.

Gipasabot ni Pelare nga ang matag establisemento adunay seguridad nga gipatuman apan mas kinahanglan sab nga kumustahon ug i-review.

Ilabi na nga anaa na sa mga buwan nga “ber” nga mas daghang ang transaksyon may labot sa kwarta.

“We are happy that the mayor will be there (sa meeting) in order to send a strong message sa mga would be criminals that Talisay City is not safe for them,” asoy ni Pelare.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph