ORMOC CITY, Leyte--Gidagsa sa liboan nga mga tawo ang pagsaulog sa Dakbayan sa Ormoc sa ilang ika 72 nga Charter Day, Dominggo, Oktubre 20, 2019.
Alas 4 pa lang sa kadlawon gisugdan ang Fun Run for vision nga gipasiugdahan sa Lions Club sa City Plaza.
Atol sa Fun Run, gisugdan nasab ang pagluto sa 30 ka litson baboy likod sa Ormoc Museum.
Napulo ka mga litsunero ang nagpatigiay kung kinsa nila ang dunay lami nga lasa sa litson diin matod ni Mayor Richard Gomez nga sa sunod Charter Day mas daghan na nga litson ang lutuon.
"Sampu lang muna kinuha namin although there are more than 20 lechunero, which we will do nalang siguro next year para i-showcase yung lechon ng Ormoc" matod ni Gomez.
Gipauna og kaon ang mga niapil sa parada ug dayun gibuksan sa publiko.
Sa samang higayon, gi inagurahan usab sa Energy Development Corporation (EDC) ang ilang Well Head Landmark sa Barangay San Pablo, Simangan Rutonda.
Gipangulohan usab ni Gomez ug mga opisyal sa LGU- Ormoc ang pagbukas sa Ormoc Museum, EDC showroom ug World War II room sa Museum.
Mihatag usab og reaksyon ang Mayor sa kontrobersiyal niya nga painting nga miani og lain lain nga reaksyon.
"Tama lang yun. Ganun talaga ang art dapat na i- evoke yung emotions mo. Pag gumagawa ka ng art at di mo na ta-touch yung emotions, hindi exciting" matod ni Gomez.
Ala una sa hapon gisugdan ang usa ka Santos nga Misa sa Sts. Peter and Paul Parish nga gitmbungan sa mga opisyal ug kawani sa LGU.
Kapin kung kulang 5 mil ang nitambong sa Charter Day Grand Parade nga gisugdan pagka alas 2 sa hapon ug nahuman pasado alas 6 sa gabie.
Ang mga opisyal sa Barangay ni dritso na sa Superdome alang sa LIGA ng mga Barangay Night.
Samtang nadugangan ang kadaghan sa mga tawo sa City Plaza sa gipahigayon nga Garbo Sa Ormoc diin gihatagan og award ang mga tawo nga nakahatag og kontribusyon sa dakbayan.
Gisunod dayun ang culminating concert uban sa OPM Hitmen ug 6cyclemind nga nakahugyaw sa mga nitambong.
Gisunod usab ang fireworks display nga nakasamot sa paglingaw sa mga tawo ug mga bata sa Children's Park.
Matod ni Ormoc City Police Office (OCPO) Director, Police Colonel Armel Gongona, naa sa 20 mil ka tawo ang nisaksi sa culminating concert.
Wala namay naitala nga mga dagkong panghitabo ang kapulisan sa maong adlaw.
Karong adlawa, Lunes, Oktubre 21, usa ka Job Fair ang gipahigayon sa Ormoc Superdome nga gipasiugdahan sa LGU, PESO ug DOLE. (Superbalita Cebu)