'Sea jeepneys' mubyahe na sugod Oktubre 28

(Sunstar file foto)
(Sunstar file foto)

MOABOT sa 5,000 ngadto sa 6,000 ka mga pasahero ang target sa MCE Shipping Lines nga maserbisyohan unya alang sa pagsugod na sa ilang operasyon sa “sea jeepney” nga mobiyahe gikan sa dakbayan sa Sugbo paingon sa dakbayan sa Naga.

Ang MyBoat nga gi-operate sa MCE Shipping Lines hingpit na nga mobiyahe sugod karong Lunes, Oktubre 28, diin mas mubo na ang biyahe gikan sa dakbayan sa Sugbo paingon sa habagatan.

Matod ni Dr. Nelson Mejia Jr., chief executive officer sa MCE Shipping Lines, nga anaa nalang sa 45-minutos ngadto sa usa ka oras ang biyahe gikan sa Pier 1 sa dakbayan sa Sugbo paingon sa pantalan sa Naga sa may Barangay East Poblacion.

Ang MV Nicole Express nga mao’y labing unang mobiyahe nga sea jeepney aduna kini’y kapasidad nga 45 ka tawo lakip na ang tripolante niini.

Gibutyag ni Mejia nga niadtong Oktubre 1, Biyernes, sila nahatagan og Certificate of Public Convenience ug Provisional Authority sa Maritime Authority Industry-Central Visayas (Marina 7) aron makasugod na sila og biyahe.

Dugang ni Mejia nga anaa pa sa 10 ka biyahe ilahang mahimo matag adlaw diin sugdan kini nila sa alas 5:30 sa buntag.

Apan karong Lunes, sa pagsugod sa ilahang biyahe, alas 7:30 sa buntag ang una nila nga biyahe.

Nasayran nga dili pa nila hingpit nga mapatuman ang 30-minutos nga travel time tungod kay aduna ba sila’y gisuta nga mga mabaw nga bahin sa kadagatan sa Talisay ug Minglanilla.

Gibutyag usab ni Mejia nga sa dili pa mahuman ning tuiga, magpuno sila og laing duha ka mga sea jeepney aron madugangan ang demand.

Sa pagkakaron anaa pa lang sa 450-500 ang maserbisyohan sa MyBoat apan tumong sa MCE Shipping Lines nga maminusan kining problema sa pampublikong transportasyon alang sa mga sumasakay.

Alang sa buwan sa Nobiyembre, gikatakda nga anaa sa 60-70 ka tawo ang kapasidad sa ilahang umaabot pa nga barko.

Gipasabot ni Mejia nga ang MyBoat susama kini og jeep diin open air kini.

Anaa sa P60 ang plete niini apan aduna’y standard nga 20% nga discount alang sa mga tinun-an, senior, ug PWD.

Sa pagkakaron ang dakbayan sa Naga pa ang andam na alang sa ilang pantalan ingon man aduna usa’y plano ang MCE Shipping Lines nga mobiyahe paingon sa dakbayan sa Carcar, apan anaa pa kini sa negosasyon.

Wala hinuon gisirhan ni Mejia ang posibilidad nga sea jeepney paingon sa amihanang Sugbo.

Pebrero pa ning tuiga dihang gipahibawo sa maong kompanya ang plano sa MyBoat apan tungod sa mga revision ug permit nadugayan kini.(Superbalita Cebu)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph