Sugilanon: Ang barahan sa gugma ni Emma

ALANG kang Emma dili gamay kining iyang suliran kalabot sa gugma. Trayinta na iyang edad ug matod pa ni Mama niya, angay na siyang magminyo aron dili mabiyaan sa tren. Duha ang iyang maghahalad. Si Leandro, trayintay singko, ug si Aldon, trayintay tres, pulos nasuod sa iyang dughan. Apan usa ray iyang kasingkasing. Kanilang duha usa day makatag-iya niini. Mao kini ang misamok sa hunahuna ni Emma karong gabhiona samtang naghigda siya sa kama sa iyang lawak hangtod nga nadungog niya ang pagbagting sa dakong orasan sa bungbong didto sa sala sa ubos sa ilang balay. Alas dose na sa kagabhion. Gipiyong niya ang iyang mga mata ug naghunahuna. Unya mikalit pagbuka ang iyang mga mata sa iyang nahunahunaan. Maghimo siyag barahan sa iyang gugma. Mipahiyom siya. Pagka ugma mitawag sa selpon si Leandro. Hapit na alas singko sa hapon nga maoy tinggawas nila sa kompaniya nga iyang gialagaran isip ‘auditing staff.’

“Em, pwede ma-imbitar kag panihapon karon?” matod ni Leandro. “Wa man kaha kay deyt?”

“Ikaw ang nakaunag hangyo,” tubag ni Emma nga nagpahiyom.

“So, invitation accepted?” ni Leandro. “Invitation accepted,” sumay ni Emma.

“Okey. Hapiton tika diha sa inyong office.” ni Leandro.“Sayo pa man ipanihapon, uy!” ni Emma. “Ay, manuroy una ta pagpalabay sa oras,” ni Leandro. “Okey!” ni Emma.

Wa madugay miabot si Leandro sakay sa iyang awto. Gi-parking niya kini tungod sa bilding diin nahimutang ang opisina nilang Emma. Gi-teksan niya ang dalaga.

“Am here, waiting,” ang mensahe ni Leandro.

Wa tubaga ni Emma ang teks ni Leandro. Migawas siya sa geyt sa bilding ug miduol sa awto ni Leandro. Giablihan niya ang tuo nga pultahan sa ‘frontseat’ ug milingkod tupad sa ulitawo. Gipaandar ni Leandro ang sakyanan.

“Asa man ta man manuroy?” ni Emma.

“Adto ta sa SRP... magpahangin. It’s nice to breathe the fresh air from the sea!” ni Leandro.

Didto sa South Road Properties mikawas sila sa awto ug mipaingon sa sementadong lingkoranan nga nag-umbaw sa ‘breakwater’ nga tinumpi nga mga bato.

“Em, kahibawo kong nanguyab sab nimo si Aldon. Kinsa man gyud namong duha ang imong sugton?” Gibuak ni Leandro ang kahilom nga naghari nila niadtong tungora.

Gitan-aw ni Emma ang nawong ni Leandro. “Mao na ang akong dakong suliran kay kamong duha pulos suod sa akong dughan. Hatagi ko ninyo og igong panahon nga kini masulbad.” Unya ang ilang panag-estoryahay misangpot sa ubang mga butang nga dili konektado sa gugma

Gitan-aw ni Leandro ang iyang ‘wrist watch.’ Alas siyete na sa gabii.

“Tana, Em. Let’s eat!” agda ni Leandro nga mitindog ug mikupot sa kamot ni Emma aron motindog ang dalaga. Nabati ni Emma ang dinagaang sa palad ni Leandro nga mihakgom sa iyaha. Kini wa niya damha nga mikuyanap sa iyang galamhan. Nanakay silag balik sa awto.

Ang awto ni Leandro misubay sa dalan paingon sa SM Seaside City. Didto sila mangaon sa Xam’s. Human sa ilang panihapon namalik sila sa sakyanan ni Leandro. Didto may gihangyo si Leandro kang Emma. Misugot si Emma. Gipadagan ni Leandro ang awto ug didto kini sangko sa usa ka motel sa Mabolo. Sa lawak nga ilang gisudlan gidawat ni Emma ang gugma ni Leandro. Ang namugna niyang barahan sa iyang gugma mao kini: ‘Kinsa nilang duha ni Leandro ug Aldon ang unang mohangyo sa usa ka bililhong butang sa iyang pagka babaye maoy makatag-iya sa iyang gugma.’ (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph