DEAR Noy Kulas,
Good day nimo. Tawga lang ko og Ms. Aries. Mapatambag ko nimo kay naglibog na kog maayo sa akong situation karon. Naa koy boyfriend. One year na mi kapin niya. Naa na sab miy umaabot nga baby.
Mao na ang akong problema. Ang iyang mother di gusting moatubang sa akong mama. Nakasabot man lang gud ko. Ang wa lang gyud nako ganahi mao ang iyang estorya nga “ayaw jud ko apila sa inyong problema ha.” Feel gani nako, Noy, nga wa siya mo-care namo.
Nisulti sab siya ganahan nga makig-face-to-face sa akong mother para estoryahan sa akong gisabak.
Ang akong mother di sab ganahan nga moadto ko sa mother sa akong BF kay wa sila moatubang sa akong mother. Karon nga nagsabak na ko wa gyud sila mamalay mao nga nasuko og maayo ang akong mother. Ang BF moadto man sa amoa, apan ang problema ang iyang parents. Di gyud kuno sila. Naglibog ko kay maayo man ang iyang inahan apan di man siya moatubang sa akong mama.
Kining akong mama ug iyang mama karibal kaniadto. Please tambagi ko, Noy.
MS. ARIES
rMs. Aries,
Maayong adlaw kanimo ug sa imong parents. Problema gyud bitaw ning parents usahay basta ingon ana nga sitwasyon. Labina kon pulos magpagarbuhay ang duha ka mga habig, sama nianang nahitabo ninyo.
Apan kon atong naandang batasan ang sundon, sumala sa atong kultura, ang iyang parents ang angay nga moatubang ninyo kay tulubagon man na sa iyang mga ginikanan kon ang pagpamalay maoy hisgutan. Kanang dagan karon sa hitabo naingon niana tungod sa ila sab nga garbo tungod sa miaging mga hitabo. Naapektuhan na hinuon ang inyong relasyon.
Base sa mga kasinatian, di sab maayong magdali-dali kon ingon niana ang sitwasyon kay mas mosamot na tingali hinuon kagubot, labina sa kasal kon wa pa magkasinabot ang inyong parents. Kon di maayo ang ilang pagtagdanay, mas mosamot pa unya na tungod sa ilang mga garbo.
Ang importante karon mao nga maayo ang imong pagsabak ug pagpanganak. Pangandami ninyo na og maayo kay di baya lalim ang gasto ug di sab sayon ang pagpanganak kon di ka matarong sa pag check up sa doctor alang sa imong pre-natal care. Ayaw lang una na huna-hunaa ang kasal kay basin unsa pa unya ang dagan sa mga hitabo ug maapektuhan ang imong pagsabak.
Ipaneguro nga mogasto sila kay kon wa ka pa hilabti nianang lalake, di ka momabdos ra ba. Ila gyud nang responsibilidad kon balaod sab ang hisgutan. Seguroa sab nga human sa pagmabdos, manubag sa iyang responsibilidad ang imong uyab. Sa samang higayon, anha na tingali mao ang panahon nga maghisgot mo sa kaminyuon. Kana kon nagkahigugmaay pa mo nianang mga higayuna kay usahay ra ba ang panagbingkil maoy mopawagtang sa pagbati.
Sa pagkakaron, be concerned sa imong baby sud sa tiyan. Nahibawo kong naguol mo nga wa ka makasal. Daghan na ra ba ang nasayop sa pagtuo nga ang pagpakasal dinaliang sulusyon sa pagmabdos. Apan diay sayop ang pagdali-dali. Later na kini naamguhan sa uban kay lagi,ang kauwaw maoy giunag huna-huna.
NOY KULAS