KAUBAN ang DTI representative nga si Miss Karen Sayson, nagbola na ta sa atong anniversary promo sa Superbalita Cebu niadtong Dominggo mga alas 4 sa hapon dinhi mismo sa front office.
Na-shock si Miss Karen kay sagad sa mga nakadaug mga senior citizen nga gikan pa sa mga lagyong lugar. Apan kita tanan adto man gyud padung pagka-senyor. Hehe...
Bitaw mas nindot ug lingaw gyud basahan ang tabloid kay ato gyung pinulongan, way fake news ug di na kinahanglan pa’g wifi.
Matod ni Miss Karen mobasa sad kuno siya og Superbalita ug paborito niyang basahon gawas sa showbiz kana kunong sugilanon ug ang Noy Kulas.
Nahuman mi og bola mga alas 5 sa hapon pero naa pa gyuy nag-abot-abot nga mohug pa unta og binultong kupon apan human na man mi. Ayaw mo kabalaka kay dunay laing promo ang Sun.Star nga ilang ianunsyo sa di madugay. Kini ato teaser ra ni.
Atong ipatik ang winners ugmang adlawa, Miyerkules, Oktubre 23, atol mismo sa ika-25 nga kasumaran sa Superbalita Cebu.
Magpasalamat ko sa tanang nisuporta ning atong kalihukan sa atong mga suki nga hangtod karon nagpabiling loyal sa Superbalita ug sa atong mga sponsors.
Masipang pakpak sa Cebu’s Original Boneless Lechon, atong pakpakan ang Chilen Chicharon nga lami sad diay ang hang no, ug ang bag-ong Mountain Paradise Resort sa lungsod sa Compostela. Daghang Salamat ug Happy Anniversary ka-Super! Dinhi lang gihapon sa atong Tagming ming, ming, ming...