Roldan: San Pedro Bridge sa Samal?

HAPIT 40 na ka tuig ang plano nga butangan og taytayan ang Davao City ug isla sa Samal nga sakop sa probinsiya sa Davao del Norte.

Nahimo na lang kini nga Island Garden City of Samal (Igacos) apan hangtod karon nagasakay gihapon og ferry ang moadto didto.

Gawas sa hinayhinay nga pagsemento sa dalan palibot sa siyudad ug mga nagsulputan nga resorts, dili pa tantong matawag nga siyudad ang Igacos.

Ang balas ug graba nga gigamit sa iyang imprastraktura gikan pa sa Davao mao nga mahal kaayo matag metro kubiko. Niadto pang 1990s nga nakita ko kining maong proyekto nga gina-estoryahan sa Regional Development Council ug sa Davao City Council nga gisuportahan sa Japan International Cooperation Agency (Jica).

Apan sama sa kadaghanan kanato, naglibog ako nga hangtod karon wa pa kini masugdi. Ayaw na lang ko pangutan-a sa hinungdan kay kahibalo ko nga pareho ang atong rason nganong naga-ferryboat pa gihapon ta kung moadto didto.

Ang sagad natong madunggan kay wa pa moabot ang ayuda gikan sa Jica. Sa magkasunod nga administrasyon ni President Arroyo ug Aquino, abi nako nga madayon na kini tungod kay higala nila si kanhi Mayor Rody Duterte nga nahimo nilang kaalyado sa politika.

Apan niadtong niaging Lunes atol sa State of the City Address (Soca) ni Mayor Sara Duterte-Carpio nga anaa na sa pinal nga hugna ang Davao-Samal Bridge Project nga nagkantidad og P23 bilyon.

Naghangyo ang mayor nga suportahan sa Sangguniang Panlungsod og sa tanang ahensiya sa gobyerno ang maong plano aron madali kining matukod sa dili pa mahuman ang termino sa iyang amahan sa 2022.

Nangomedya pa siya nga magpakamatay kung di mahuman sa maong tuig kay usa kini sa dinagkong proyekto ubos sa build-build-build project sa iyang amahan.

Anaa na kini karon sa ikaduhang hugna sa “feasibility study” ug hapit na sab mahuman ang desinyo nga gihimo sa Department of Public Works and Highways.

Gihangyo usab niya si Neda Secretary Ernesto Pernia nga dalion ang paghikay sa papeles niini nga atoa na karon sa kaulohan. Aduna kini gitas-on nga 2,300 metro o sobra duha ka kilometro nga nagkutay sa “main land” Mindanao og sa Igacos.

Busa dako kaayo ang kalipay sa taga Igacos ug taga-Davao sa maong proyekto. Ang problema na lang kay kung unsa ang pangalan sa taytayan?

Posible tawagon kining San Pedro Bridge nga maoy patron sa Davao sama sa San Juanico Bridge nga nagkutay sa isla sa Samar ug Leyte ug kaha tawagon kini nga Gov. Vicente Duterte Bridge.

Dili ikalimod nga magdala kini og hilabihang ekonomikanhong kalambuan sa Igacos. Apan gawas niini, unta lantawon sa gobyerno ang mahitabo sa mga tawo nga maapektohan sa proyekto sama sa mga trabahante, tripulante ug kawani sa kompanya sa ferryboat.

Bantayan sab ang kinaiyahan kay basin mahisama kini sa nahitabo sa Boracay nga gipaserado ni Presidente Rody. Walay dako ug sustenidong kalamboan kung kulang ang imprastraktura sa usa ka lugar.

Atong suportahan ang proyekto sa gobyerno ug goodluck sa Igacos. “Siyudad na ni.”

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph