Editoryal: Problema sa sementeryo

HAPIT na ang Kalag-Kalag, madiskubrehan na sab ang mga nag-unang problema sa mga sam-ang nga hangtud karon wala naatiman.

Dunay sementeryo nga iya ang pagdumala sa lokal nga kagamhanan ug duna sab pribado. Gani sa Davao City ang Wireless Cemetery, Roman Catholic Cemetery ug Madapo Hills Public Cemetery maoy pinakadako nga sementeryo ning dakbayan.

Matag Kalag-Kalag dunay manggula nga mga problema, una mao ang pagkawala sa ilang mga lubong, diin giingon nga walay abiso ang nagdumala sa pagbungkag kay milapas na sa tagal, wala ma-renew, gibutang nalang ang bukog sa minatay didto sa dakong krus.

Naa sab gipangbahaan nga sementeryo gumikan kuwang og drainage system sa dapit, luoy kaayo ang mga miduaw sa ilang mga minatay labi na og mahigayonan nga nag-ulan nianang mga semanaha.

Usa sa mga gipangbahaan nga sementeryo bisan gamay lang ang bunok sa ulan mao ang Panacan Cemetery ug Maa Cemetery diin sa kadugay na sa problema gipuy-an nalang og isda nga hito ang tubig nga napundo.

Una nahimong presidente sa Pangulong Rodrigo Duterte, gipahiluna niini ang kanhi nagtapun-og nga mga lubong sa daang Wireless Cemetery, karon han-ay na kaayo naka-apartment type na, samtang ang ubos sa Roman Catholic, mao ang giingong sementeryo sa dakbayan nga naingon ni PRRD nga puwede ngadto ilubong, libre ang mga nalambigit sa droga nga napatay sa wa mailhing mamumuno.

Dili lamang sa sementeryo sa Davao City dunay problema, apan sa uban pang lugar ning Davao Region, nga gikan pa kaniadto hangtud karon, anaa gihapon ang suliran.

Daghan ang problema matag Kalag-Kalag, unta ning higayona sa wala pa ang pagdasok sa tawo sa mga sam-ang, mahatagan na og kasulbaran aron dili kaayo hasol sa katawhan ang pagduaw sa ilang mga minatay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph