SUPERBALITA DAVAO

Santo Niño, nagmilagro?

DAVAO. Gituohan sa mga deboto nga milagro ang gipakita ni Senyor Santo Niño atol sa linog kay bisan sa munisipyo sa Magsaysay, Davao del Sur nahug kini sa salog apan pabilin nga nagbarog. (Orlando B. Dinoy)

DAVAO DEL SUR -- Pipila ka mga deboto ni Senyor Santo Niño ang nipatim-aw nga usa ka milagro ang gipakita kanila sa batang Hesus human wa mabuak ang mga rebulto bisan nahagbong sa salog atol sa kusog nga linog.

Sa Barangay New Clarin, Bansalan, gibutyag ni Ginang Teresita, 52, nga miliki ang mga istruktura ug pader sa ubang parte sa ilang balay ug nahug sa sementadong salog ang imahe sa Santo Niño.

Apan, dako ang iyang katingala kay wa maunsa ang rebulto bisan gamay nga tatsa.

Bisan sa Barangay Poblacion sa lugar, gitataw sab ni Mercy Enod, nga nangahagbong na ang mga flower vase sa ilang altar apan igo lang mitakilid ang imahe sa batang Hesus.

Susamang kasinatian ang gipabuhagay sa mga kawani sa munisipyo sa Magsaysay human naguba ang mga istruktura atol sa magnitide 6.3 nga linog niadtong Oktubre 16 sa gabii.

Bisan nangabuak na ang mga natagak nga flower vase ug ubang gamit sa mayor’s office apan wa maunsa ang imahe.

Nasayran nga nahug ang Santo Niño sa salog apan pabilin kining nagbarog mao nga gilantaw nila nga usa ka dakong milagro ang gipakita sa patron sa lungsod.

Dako ang pasalamat sa mga kawani nga gabii nahitabo ang linog sanglit sa nakitang pagkahagbong sa mga kesame sa first floor ubay-ubay ka kinabuhi ang maangol o makalas kung gitay-og sa oras sa trabaho.

Ubay-ubay pa nga mga testimonya ang gipadayag sa mga deboto sa Santo Niño nga alang nila nagpakita lamang nga milagroso kini. (Orlando B. Dinoy)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph