COMPOSTELA, Comval Province -- Padayong gitabang sulod sa balay tambalanan ang amahan nga gidunggab sa iyang anak sa Purok 1, Barangay Lagab, alas 4 sa hapon, Dominggo, Oktubre 20.
Ang biktima mao si Leonard Salupesa, Sr., 49-anyos, mag-uuma, ug molupyo sa nahisgutang dapit.
Base sa inisyal nga imbestigasyon, samtang ang biktima nag-ayo sa iyang motor atubangan sa ilang balay, nakit-an niini ang anak nga ginganlan og GL Salupesa, 19-anyos, harvester, diin gipangutana kung asa gibutang ang trapal ug sundang nga gamiton sa pagpangandam sa kasal sa igsuong lalaki sa suspek.
Sumala pa ang suspek walay tingog nga mibiya sa amahan ug wa madugay mibalik ug gidunggab iyang amahan gamit ang kutsilyo ug naigo sa tuong bahin sa likod.
Human sa krimen, ang suspek midagan padung sa humayan ug midiretso sa National Highway samtang ang biktima gidali pagdala sa Comval Provincial Hospital sa lungsod sa Montevista aron matambalan apan wa madugay gibalhin pagdala sa Davao Regional Medical Center sa siyudad sa Tagum alang sa dugang medikasyon.
Sa gilusad nga hot pursuit operation sa kapulisan uban sa tabang sa mga residente sa dapit, malampusong nasikop ang suspek ug gikustodiya sa Compostela Municipal Police Station samtang giandam ang tukmang kaso nga ipasaka batok kaniya. (Dexter T. Visitacion)