WA NAKO sipyata ang imbitasyon sa STAND Foundation nga motambong sa book launching sa “Beyond Will & Power: A biography of President Rodrigo Roa Duterte” nga sinulat ni Earl Parreño.
Nakaila ko ni Earl sukad pa kaniadtong batan-on pa mao nga kahibawo gyud ko nga maayo pagka-research kining libro nga kabahin sa kinabuhi sa usa ka kontrobersyal nga presidente sa Pilipinas.
Bag-o pa ko nagsugod sa pagbasa ug naa pa sa bahin sa mga katiguwangan ug mga ginikanan ni Digong Duterte.
Sa launching, gipalaway kita ni Earl kabahin sa unod sa libro sama sa pagkalambigit niini sa mga Fernandez sa Sugbo. Apan atong nabasa karon ang kalawom diay sa research diha natugkad gyud niya nganong pamilyang Fernandez diay si Soledad Roa Duterte, ang inahan ni Digong.
Sa prologue, naghisgot sab si Earl nga ang iyang inahan diay maoy unang gitanyagan ni Presidente Cory Aquino nga mahimong OIC vice mayor sa Syudad sa Davao.
Apan nisibog kini si Nanay Soling ug iyang giduso ang iyang anak nga si Digong. Mao kini ang pagsugod ni Digong sa politika.
Nakahibawo na ko nga walay konklusyon si Earl kabahin sa presidente niining maong libro. Apan giganahan ko mobasa kay napuno kini og mga detalye basi sa asoy sa mga nakaila mismo sa presidente.
Matod pa, ang mga pro Duterte mas makaila karon sa ilang gibutohan ug giisip nga maoy magdala og kausaban sa Pilipinas. Matuman sab sa mga anti-Duterte ang tambag ni Sun Tzu nga “know your enemy.”
Pimentel
Akong idol kini si Nene Pimentel, 85, sukad pa kaniadtong 1981-82 dihang nitumaw kini siya isip usa sa mga lider sa kalihokang kontra sa diktadurya ni Marcos. Inspirasyon kini siya kanamong nakigbisog alang sa demokrasya ug kagawasan sa panahon sa diktadurya.
Subo nga palandungon nga nga namatay kini siya. Condolence sa nabiling pamilya.
Wa ko masuod niining anhing Nene Pimentel. Ang akong mahinumdoman mao ang akong pagsuporta sa iyang kandidatora isip senador ug sa iyang anak nga si Koko sulod sa sa pipila ka tuig. Nakahinumdom ko nga duna kadtoy usa ka pribadong miting didto sa kaulohan nga akong natambungan kuyog sa iyang asawa.
Apan ang akong mahinumdoman mao kadtong pipila ka tuig nga siya nahimong political detainee dinhi sa Sugbo. Tayming lang dihang nahimo sab ko nga political detainee og makadiyot, wala na siya sa Metrodiscom kay gibuhian na. Sila na lang anhing Dodong Holganza ug higalang Joeyboy Holganza.
Niadtong panahona, ang perming makaduol ni Pimentel mao ang mga reporter sama ni Ely Baquero ug ang television crew sa GMA 7 niadtong tungora nga si Boy Solomon isip reporter ug Yunie Cahambing isip cameraman. (@anol_cebu sa Twitter)