MACO, Comval Province -- Kasong reckless imprudence resulting in multiple homicide and physical injuries and damage to property ang ipasaka nga kaso sa mga drayber nga nalambigit sa disgrasya alas 9 Lunes sa buntag, Oktubre 21, sa Purok 2 Hijo Maco Mati Davao Coastal Road.
Sa pinakaulahing impormasyon, nasayran nga tulo ang dead on the spot samtang 17 ang naangol kinsa pulos pasahero sa multicab.
Tulo ka mga sasakyan ang nalambigit sa disgrasya, usa ka Navarra pick-up, Toyota Innova ug usa ka PUJ nga multicab.
Butyag ni Maco Police station commander Captain Woody Sabdani, pareho nga nagdagan sa susamang linya ang pick-up ug ang Innova, sa dihang giingong mi-overtake ang Innova sa outer lane, diin sa pagbalik niini, nabanggaan kini sa pick-up ug didto paingun sa multicab nga nagdagan sa opposite lane.
Ang kadaghanan sa mga biktima pasahero sa multicab. Ang mga namatay nailhang sila si Bern Gestapa, Zaida Rongco, ug Alberto Cambal ang drayber sa multicab diin gidala sab sa ospital ang mga sakay sa Innova nga sila Paulino Camay, drayber ug Leonardo Camay.
Gikustodiya na sa kapulisan sa Maco Municipal Police Station ang drayber sa pick-up nga si Robert Paul Molina samtang ang mga nasamdan padayong nagpaalim sa ospital sa Tagum City.