TULIS. Pipila na katuig nga namingaw ang Sugbo sa balita sa tulis. Apan niadtong Sabado sa gabii nakugang ang kadaghanan sa taho nga gitulis sa 15 ka tawo ang pipila ka mga ka tindahan sulod sa JCentre Mall sa Mandaue City.
Gani, nahimo nga komedya nga gisugat sa di maayo nga balita ang bag-o nga PRO-7 chief, Police Brigadier Gen. Valeriano De Leon, dinhi sa Central Visayas tungod kay nahitabo ang tulis tulo ka adlaw gikan sa iyang pag-asumir, puli ni Police Brigadier Gen. Debold Sinas, nga mao na karong ang hepe sa National Capital Region Police Office (NCRPO) sa Manila.
Maayo na lang gani kay ang pito sa 15 ka tulisan nadakpan didto sa pantalan sa Pulangbato, dakbayan sa Bogo sa may 11:00 sa gabii sa Sabado human sila nanulis sa mga pawnshop ug money changer sud sa JCentre Mall.
Mosakay na unta ang pito ka tulisan sa barko padung sa Masbate dihang natiktikan ni Police Staff Sgt. Jojit Potot ang ilang di natural nga linihokan.
Nakatawag og backup si Staff Sargent Potot sa wala pa makasibat ang pito ka tulisan. Apan way swerte ang upat kay napusilan-patay sa pulis dihang misuway pag-ilog og armas samtang diha sulod sa police car.
Ang tulo nga buhi gihatud na sa police office sa dakbayan sa Mandaue nga maoy mopasaka sa kaso nga panulis.
Nakaingon ko nga dugay na nga way tulis diri sa Sugbo tungod kay niadtong pipila ka tuig nga nangagi grabe ang tulis dinhi sa Sugbo ug ang kadaghanan sa biktima mao ang Landbank nga iya sa kagamhanan.
Unya, dili sa pagduda, nahitabo ang panulis nga dunay bag-o nga matudlo sa hepe sa kapulisan sa rehiyon.
Hinuon, di man malas si Police Brigadier General De Leon, nga niadtong Huwebes lang misugod og lingkod sa bag-o niyang posisyon, kay nasakpan man ang pito sa 15 ka suspek.
Matud pa sa empleyado sa M Lhuillier Pawnshop nga nagtuo siya nga mga customer ang nanulod tungod sa ilang sale. Apan nakurat na lang siya dihang gisultian sila nga tulis ni. Abi gani niya og nagkomedya ang tawo. Gipahapa sila ug wa na silay nahimo. Gani, nakakita ko sa gi-post sa Facebook nga ang usa sa mga tulisan, nga nakamaskara, naglakawlakaw bitbit ang iyang pusil.
Ang dako nga pangutana karon, unsa na ta ka luwas sulod sa mga mall. Nakahibawo ta nga dunay mga gwardiya nga mosusi sa matag tawo nga mosulod sa mall. Apan ang nahitabo niadtong Sabado sa gabii nagpasabot lang kon unsa ka hugaka ang seguridad sa mall sa mga dautan tawo sama sa tulisan ingon man sa mga terorista.
Kining nahitabo sa JCentre Mall maghatag unta og leksiyon sa ubang mall.