MOSAKA gyud ang akong blood pressure sa panahon nga makadungog ko og balita nga diin ang mga biktima sa niluog nga krimen mga babaye ug tiguwang unya pamatyon pa gyud sa mga suspek. Makapamalikas tag ahat. Sama niadtong nahitabo sa usa ka negosyanteng babaye sa Talisay City nga gipatay sa iyang kaugalingong trabahante. Si Victoria Lua, 62, matod pa, gitulis ug gipatay sa iyang trabahante. Unya ang iyang lawas gisulod sa refrigerator. Pagka-brutal.
Ang principal suspect nga si Johnny Duarme, 28, mitahan sa kapulisan sa Badian. Mitahan usab ang iyang mga igsuon nga sila si Jay-R ug Jeffrey, kinsa nanghimakak sa ilang kalambigitan. Wa na sila magtrabaho ni Lua, si Johnny na lang. Sa pangidaron sa biktima, nganong gipatay pa man? Aron di makasumbong? Gisuntok lang unta, malipong na to.
Lain kaso sa pagpatay diin babaye gihapon ang biktima mao ang usa ka working student nga si Charie Mae Mancia, 23, kinsa gipatay sulod sa iyang boarding house sa Barangay Tinago. Si Mancia gisulod sa suspek nga si Emelito Familar, 24, ex-convict. Tulis ang hinungdan kay gikuha sa suspek ang cellular phone ni Mancia. Gitusak-tusak sa kutsilyo si Mancia.
Pila ra may kusog sa maong babaye. Nganong wa man lang sagpaa? Gidunggab pa. Kon wa pa lagi unta tay balaod, kaayo panitan ning klaseha sa tawo. O di ba patyon usab. Mao ta ni klasiha sa mga tawo nga angayan pabiharan sa riding in tandem o ipa-salvage. Pero unsa-on nga aduna may kitay “due process” nga gitamud.
Gumikan kay mitahan man o nadakpan ang mga suspek, moingon dayon ang kapulisan mga “considered solved” na ang maong mga kaso. Ako lang pahimangnuan ang atong mga awtoridad nga makonsiderar lang nato nga sulbad ang usa ka kaso kon mahatagan na og hustisya ang kabanay sa mga biktima. Husayon pa kining maong mga kaso ug gikinahanglan pa ang dugang lig-ong mga ebedensiya ug mga saksi aron makombikto gyud ang mga akusado. Busa di angay nga magpabaya ang kapulisan ug ang piskal sa pagtaral ning mga akusado aron makab-ot ang hustisya. Mao ni gi-ingon sa eningles nga “crime does not pay.” (bobbygnalzaro@gmail.com)