ANG labing dakong hagit sa mga adunahan mao kining paghatag sa tipik sa ilang katigayonan ngadto sa mga magkinahanglan, labi na kadtong mga kabus sa katilingban.
Kinaiya gyud sa tawo ang walay pagkakontento busa kutob sa mahimo gusto gyud kining mamentaha aron lang matagbaw pag-ayo ang kaugalingon.
Busa lisod sa mga adunahan karon nga motunol ngadto sa mga tawo nga dili sila makakuha og balos alang sa ilang kaugalingong interest.
Apan, dili tanang mga adunahan nga tig-a og kasingkasing ug walay pagbati ngadto sa mga pobre.
Niadtong Huwebes, si Senator Manny Pacquiao miduaw sa Bacolod ug sama sa naandan nag-apod-apod siya ug grasya ngadto sa mga tawo nga nagkinahanglan.
Nahimo na kining batasan ni Pacquiao ang pagtabang sa mga tawo. Dili kini tungod kay mahimo siyang usa ka politiko apan gumikan kana sa kausaban sa iyang kinabuhi dihang nakaila niya si Hesu-Kristo.
Sa iyang mensahi, gipasantop ni Pacquiao nga dili gyud madala sa lubnganan ang imong katigayonan. Matod niya ang iyang pagka-adunahan gihatag gikan sa kahitas-an.
Nanghinaut si Pacquiao nga ma-impluwensiya usab niya ang ubang mga adunahan sa paghatag sa ilang katigayonan ngadto sa mga kabus sa katilingban.
Usa ka higayon niana, dunay adunahan miduol ni Hesu-Kristo ug nangutana kon unsaon niya pagbaton sa kinabuhing walay kataposan. Matod sa maong adunahan gituman na niya ang tanang kasugoan sa Dios.
Gitubag siya ni Hesu-Kristo nga ibaligya ang tanan niyang kabtangan ug ipanghatag sa mga kabus aron duna kay bahandi sa langit ug sumonod ka kanako.
Masubo ang adunahan sa pagkabati sa tubag ug milakaw.
Si Pacquiao malipayon nga mituman sa kasugoan sa Dios ug labaw sa tanan malipayong migahin sa iyang katigayonan alang sa mga kabus.
Dili kinahanglan nga mahimo nga adunahan una kita motabang sa atong isig ka tawo. Tinguhaa nga sa matag adlaw, makakita ka og oportunidad nga makatabang og tawo sa bisan unsang paaagi.
Ang gamay o dako nga matunol nga tabang bililhon na kana sa tawo nga nakaangkon sa maong abag. Ug mas bililhon kana nga kalihukan sa mata sa Dios.
Ayaw na paabota nga mahimo kang sama ni Pacquiao, karong panahona mao ang tukmang higayon nga mahimo kang makapahalipay sa imong isig-ka-tawo.