DAGHANG gibati og kugangkugang sa nahitabong tulis sa J Center Mall sa Barangay Bakilid, dakbayan sa Mandaue niadtong Sabado, Oktubre 19, 2019, sa gabii diin girumbo sa mga tulisan ang mga pawnshops ug buhatan sa money changer sa mga tulisan.
Ang security guard sa usa ka jewelry store nga gitulis ang nakaangkon og samad human kini bunali sa pistola sa usa sa mga tulisan sa iyang ulo.
Usa ka zumba instructress, kinsa naatlan nga didto sa sulod sa maong mall atol sa hitabo ang misaysay sa iyang kulba nga kasinatian, pinaagi sa social media.
Matod niya nga pipila lang ka segundos sa dihang padulong na unta siya ug ang iyang kuyog nga mangaon sa restaurant, kalit lang aduna silay buto-buto nga nadungog.
Sa ilang kalisang nanghapa sila sa sawog apan alang sa igong seguridad naabot sila sa kusina sa usa ra usab ka kan-anan sulod sa mall.
Ilang nakita ang mga tawo nga nagkatibuag og panagan nga sama kanila gibati ang tumang kahadlok ug kalisang. Si Josephine ug ang iyang kuyog usa lang sa pipila ka mga gatusan nga nakasinati sa ingon.
Kita sayod nga ning adlawa, Sabado, tingsuroy ilabi na sa mga pamilya. Magpalabay ug magpabugnaw sa panahon sulod sa mall kay anaa man lagi ang daghang kalingawan, apan ang hudlat sa siguridad maoy misugat kanila.
Hain na man diay ang kasiguroan sa publiko sulod sa mall? Ingon ani na ba lang diay kasayon nga makahimo ang mga dautang elemento ug mga krimen bisan pa man atubangan sa daghang mga tawo?
Aduna man tuoy anino sa kasulbaran sa hitabo tungod kay napatay ug nangasikop man ang mga suspetsado, apan angay lang usab siguro nga adunay leksiyon nga makat-onan ang hingtungdan aron paghatag og kasiguroan sa publiko?
Dugang hugot sa pagbantay ang ipahaom.