MIPAKATAP og 19 puntos si Rodolfo Borja, midugang og tag 11 puntos matag usa sila si kanhi PBA player Renato Alforque, Ronan Bulawan ug Loyd Gimena aron pangulohan ang Red Team ngadto sa 100-96 nga kadaugan batok sa Black Squad sa usa ka Basdiot Basketball Association exhibition match niadtong Sabado sa Bag-ong Basdiot Sports Complex sa lungsod sa Moalboal.
Sa pagpangulo ni Robert Gabato kinsa mipuga og 27 puntos, tulo niini sa three-poing area, ang Black maoy unang nakaarangkada sa first half diin milabaw kini og kapin sa 10 puntops.
Diha na sa tungatungang bahin sa fourth quarter nagsugod sa pagsakmit sa labaw ang Red pinaagi sa sunodsunod nga lusot ni Alfoque nga gitimonan sa fastbreaking plays nila ni Borja ug Bulawan aron duslitan ang 8-2 nga rally.
Diha higayon nga misuway unta sa pagbakwi sa bintaha ang Black apan nahutdan kini sa oras.
Ang special match maoy nagsilbing preliminary sa championship game sa kapin sa usa ka semanang 1st Tubu Master Construction and Services basketball tournament tali sa Admin team ug Garden Village.
Sa maong panag-engkuwentro, yanong gidominar sa Admin ang Garden Village, 87-64.
Sa naandan, si Paul Campana mikablit og 22 puntos sa maong kadaugan ug maoy nahimong most valuable player sa torneyo nga nagsilbing usa sa mga kalihukan sa Tubu Master ning buwan sa Oktubre.
Ang upat ka mga pambato sa Cebu Casino Ethyl Alcohol sa MPBL nga sila si William McAloney, Fletch Galvez, Bongbong Nunez ug Nichole John Ubalde maoy nagsilbing guest sa katapusang adlaw sa tournament.
Mga puntos:
Red (100) - Borja 19, Alforque 11, Bulawan 11, Gimena 11, Migallen 8, Bardos 8, Bani 7, Sari 6, Gabales 6, Abunales 4, J. Borja 3, Donaldo 3, Domugho 2, Canoy 2, Canitan 1.
Black (94) - Gabato 27, Tapales 16, Paman 8, Pardo 7, Deniega 6, Pajagamas 4, Dagooc 4, Parami 4, Dondon 4, Butalid 3, Pocong 3, G. Gabato 2, Ubas 2, Montes 2, Dion 2. (JBM)