NAKAPUGNIT og luna ang 2000 Goats alang sa semifinals sa University of San Carlos-North Alumni Basketball Club: Cebu City Mayor’s Cup Division II human nila mabuntog ang 2000 Millenium Bugs, 90-83 niadtong Dominggo, Oktubre 20, sa USC North Campus gym, Gen. Maxilum Avenue, dakbayan sa Sugbo.
Si Joel Dinawanao maoy nahimong sentro sa opensa sa Goats human kini mipakatap og 35 puntos, 13 ka rebounds ug tulo ka assists nga igo na kaayong nakapahimo niyang best player of the game.
Laing nakalusot usab sa semis mao ang 2005 Chameleons nga mipatapsing sa 2004 Rebels, 76-75.
Sa Division I, gipalagpot sa Sipat ‘98 ang 1995 Pirates, 74-69, alang sa semis samtang wa usab magpabitin ang 1996 Chubbies ug ilang gilupig ang 1993 Dragons, 49-45.
Mihulma usab og kulbahinam nga daog ang 2008 Flyboys, 81-79, batok sa 2009 Legacy sa Division III ubos sa pagpangulo ni kanhi USC Warrior Miko Santos nga may 23 puntos.
Ang 2005 Samurai miabante usab sa sunod round human kini mitigbas ssa 2010 Pioneers, 89-78.
Samtang sa Seniors Division, gipakita sa 1985 Legends ang ilang kalantip ug pinaagi sa kaidlas ni kanhi PBA player nga si Lou Regidor ilang gilubong buhi ang 1987 Bro, 73-46.
Si Regidor, kanhi sakop sa San Miguel Beer, milanit og 26 puntos, nga gidayandayanan og 19 ka rebounds.
Ang 1990 Titans misubay usab sa subok paingon sa semis human nila palagputa ang Golden Warriors, 75-65. (JBM)