US Team moabot sa Sugbo

GRUPO sa mga American basketball players ang gikatakdang moabot dinhi sa Sugbo karong Nobiyembre 3 aron pagpahigayon og sunodsunod sa mga tour ug exhibition games sa pipila ka mga lungsod ug silingan dapit sa Kabisay-an ug Mindanao.

Kini maoy gibutyag ni Albert Alocillo, kanhi coach sa University of Southern Philippines-Foundation, kinsa maoy nakig-coordinate sa maong grupo pinaagi sa iyang bag-ong natukod nga Coach3A Basketball Training Camp.

Nangulo sa grupo si Anthony Winningham, 6-2, sa Lincoln University, Roy Clayter, 6-4, sa Johnshon County Community College, Jaelen Bron, 6-6, Jaeven Brown, 6-3, Dewayne Charles, 6-3, ug Jamaal Mitchell, 6-3, sa ABA Kansas City Grillers.

Magdala sa ngan nga Sirius Star Pilipinas Team, unang mopakita og aksiyon ang mga Amerikanhong langyaw sa Talibon Bohol ubos sa pag-ayuda ni konsehal Raul Austria sa Nobiyembre 4 ug Nobiyembre 5.

Ikasangka sa Sirius Star Pilipinas team ang Bohol Selection nga pagabituonan sa pipila ka mga kanhi PBA players, nga sagulan usab og pipila ka mga imports imports ug local players.

Samtang sa Nobiyembre 6, gipahibawo ni Alocillo nga ang US Team mosakbang sa San Remegio Beach Club squad ni Mark Ynoc sa Lawaan, Oslob, Cebu.

Gipaabot nga mo-reinforced sa San Remegio mga magduduwa sa Maharlika Pilipinas Basketball League (MPBL) ug mga kanhi PBA players.

Moduwa sila sa Davao City sa Nob. 8, Nob. 9 as Panabo City ug sa Tagum City sa Nob. 10 batok sa Montana Pawnshop.

Sa Nobiyembre 11, mopatighug sila sa Cagayan Valley sa dili pa sila mobalik dinhi sa Sugbo alang sa laing hut-ong sa mga special ug exhibition games.

Sa Nobiyembre 16, adlawng Sabado moduwa sila Alegria batok sa San Remegio ug nianang pagka Dominggo adto na usab sila sa Alcantara Big Dome batok sa Lite Shipping company.

“This is one way of promoting sports tourism. Nya makatabang sab ni sa pagpa-upgrade sa level of competition sa basketball especially sa probinsiya. Actually, gustong mo-share sa ilang kahibawo sa basketball through international exposure,” matod ni Alocillo.

Sa samang higayon, gibutyag ni Alocillo nga andam motanyag ang Coach3A og mga training camp ug international ug invitational games. (JBM)