GIPANAKTAK ang mga barangay health worker (BHW) sa dakbayan sa Talisay kon adto mopaluyo sa kandidatura ni kanhi Bise Mayor Aberdovey Belleza.
Pipila ka mga BHW nga nailhang lunod patay nga mga lumalaban ni Belleza ang gisugdan na sa pagtaktak human wa mosanong sa pagbali og suporta ngadto kang Bise Mayor Alan Bucao.
Mga BHW nagdawat lang og tag P300 nga honorarium matag buwan ug gihulagway nga dako kaayo og abag sa mga opisyal sa barangay pagpatuman sa mga kalihukan sa ilang dapit.
Si Belleza nga nahinabi sa Sun.Star Superbalita nihulagway sa gihimo sa administrasyon nga “foul” tungod kay pagpanggukod na ang gihimo.
Wa hinuon ibutyag ni Belleza kon diin nga barangay ang gipangtaktak nga mga BHW apan tua sab sa pikas ang kapitan nakapusta.
Si City Administrator Richel Bacaltos nga maoy campaign manager sa administrasyon nitug-an sa Sun.Star Superbalita nga way basehanan ang pasangil ni Belleza.
Giangkon ni Bacaltos nga ilang gihimo ang loyalty check sa mga BHW apan wa nila taktaka kadtong tua nisuporta ni Belleza.
“Ato gyud na nga girespituan ang tagsa tagsa ka baruganan sa atong mga BHW ug wa sila pugsa kon asa sila mosuporta. Gihimo nato ang pagpangutana asa sila kay mao man na sila ang kuhaon nato nga ubang lider,”pasabot ni Bacaltos.
Sa laing bahin ,namatikdan sab nga di na kaayo dayag ang pagkuyogkuyog sa mga kapitan kang Belleza tungod sa kahadlok nga kontrahan sa administrasyon.
Apan si Danny Caballero,kandidato pagka konsehal sa Liberal Party (LP), nitug-an sa Sun.Star Superbalita nga anaa gihapon ni Belleza magpaluyo kadtong mga kapitan nga maoy nihangyo kaniya aron modagan.
“Sige man namo sila ka meeting unya mangayo sab mi og suggestion nila,”matod ni Caballero.
Si Belleza sa iyang bahin niingon nga nakasabot siya sa kahadlok sa ubang mga kapitan pagkuyogkuyog nila tungod kay ipatawag man kini dayon sa administrasyon.
Gisaaran ang mga kapitan og daghang mga proyekto sa administrasyon kon suportahan ang kompleto nga slate sa Alayon-Nacionalista Party.
Laing kandidato sa pagka konsehal sa LP nga si Dory Emit niingon nga duna ganiy mga kapitan ang wa gyud mahimuot sa incumbent nga mga sakop sa konseho tungod kay wa gyud makapakita og maayong performance.
Matod ni Emit nga silang mga kandidato sa oposisyon ang laing alternative nga kapilian.