GIREHISTRO sa Tuburan ang ilang ikaduhang daog sulod sa tulo ka duwa sa basketball sa nagpadayon nga Congressman PJ Cup 2019 nga gipahigayon niadtong Dominggo sa Pinamungajan Sports Complex.
Kini human nga nabuntog sa Tuburan ang Toledo City, 98-92, ubos sa pagpangulo ni Jeorge Canillas, konsehal sa barangaya Jagbuaya, nga may 23 puntos.
Ang Toledo pabiling wa pa makatilaw og kadaugan sulod sa duha ka duwa.
Samtang gipakaging sa Aloguinsan ang host Pinamungajan, 90-82, sa main game. Kadto maoy unang daog sa Aloguinsan sa lima nila ka mga duwa. Ang Pinamungajan nahagsa sa 1-1 nga baraha.
Si Emilio Arpay maoy nahimong best player of the game human kini mihagpat og 46 puntos. Sa volleyball event, gipildi sa Tuburan ang Toledo City, 2-1, samtang giseruhan sa Pinamungajan ang Aloguinsan, 2-0.
Niadtong Sabado sa Tuburan Sports Complex, gipahugtan sa Balamban ang ilang paghupot sa liderato pinaagi sa pagkutlo sa ilang ikatulong sunodsunod nga daog sa basketball ug volleyball events.
Ang Balamban milupig Aloguinsan, 79-72, samtang kulbahinam usab nga gipakuratan sa Barili ang Tuburan, 86-84.
Sa volleyball, giserohan sa Balamban ang Aloguinsan, 2-0, samtang gipildi usab sa Barili ang Tuburan, 2-1. (JBM)