MGA duwa karon:
5:15 pm- USJ-R batok USC (High School)
6:45 pm- USJ-R batok USC (College)
Angkunon og suway sa University of San Carlos (USC) Warriors ang temporaryong solo nga ikaduhang luna sa ilang pagpakigbatok sa University of San Jose Recoletos (USJ-R) Jaguars sa main game karong gabii sa CESAFI basketball college division sa Cebu Coliseum.
Ang Warriors kasamtangang nakigbahin sa ikaduhang dapit sa defending champions UV Green Lancers bitbit ang 6-3 nga rekord sunod sa league-leader SWU-Phinma Cobras nga adunay 7-2 nga baraha.
Importante ang pagsulod sa top two spots inig human sa eliminasyon gumikan kay aduna kini pakapin nga twice-to-beat nga bintaha sa semi-final round diin magparang ang No. 1 team batok No. 4 ug No. 2 batok No. 3.
Ang matag team sa college division adunay 12 ka mga tahas matag usa sa double-round elimination.
Sa ilang bahin, ang Jaguars nagbitay sa labing ubos nga puwesto nga nagdala og 2-7 nga rekord.
Kon buot hunahunaon, aduna pa’y poruhan ang Jaguars nga makakumpayot og puwesto semi-finals apan matawag og milagro na lang ang makaluwas kanila.
Kini gumikan kay nagkinahanglan silang modaog sa katapusan nilang tulo ka mga tahas ug mag-ampo nga mopabor kanila ang resulta sa nangahabiling mga duwa sa eliminasyon.
Sa premirong duwa, magsangka ang mga manghod sa nahisgutang mga puwersa nga mao ang Baby Warriors ug Baby Jaguars alang sa high school division.
Ang Baby Warriors ug Baby Jaguars kasamtangang nagbahin sa ikapitong puwesto nga pulos adunay 3-4 nga rekord.
Krusyal kining ilang panagsangka gumikan kay ang modaog makadugang og usa ka tikang paduol sa semi-final round nga dako pa’g abli ang pultahan. (ESL)