WALA matarog ang mga empleyado sa Kapitolyo Probinsyal ug padayon gihapon pagkanta sa Lupang Hinirang nga binisaya nga dunay titulong “Yutang Pinangga.”
Kini taliwala nga adunay mikwestyon ug mireklamo niini ngadto sa National Historical Commission of the Philippines (NHCP).
Pahayag sa NHCP nga ila kining hatagan og pagtagad gumikan anaa sa balaod nga pwede kining itudlo sa pinulongan sa usa ka lugar, apan dili kantahon ug ang Tagalog version lamang maoy awiton nga mao kining “Lupang Hinirang.”
Apan hugot nga nibarog ang kagamhanan sa probinsya ubos ni Misamis Oriental Governor Bambi Emano nga walay makababag pagkanta niini nga pulong kay wikang Filipino gihapon kini ug ang pagkwestyon usa ka giingong matang sa diskriminasyon sa pinulongan.
Lunes, Oktubre 21, atol sa pagpakayab sa nasudnong bandila namahayag si Board Member Gerardo Sabal nga dako iyang pagrespeto sa balaod apan walay nalapas niini gumikan kay wala giusab ug igo lang gi-translate sa binisaya nga haom sa pinulongan sa lalawigan.
“We fully respect the law but as it is we feel that we have not violated any laws of the country,” matud ni Sabal.
Dugang niini dili sayop ang mag awit niini kay dili lang ang probinsya ang gaawit niini.
“Dili lang man ang lalawigan sa Misamis Oriental ang nagbuhat niana. Ang tumong ug tinguha nato kay kita mga Bisaya man duol sa atong kasing-kasing ang pagkanta. Magpasabot kita ug unsa atong gikanta ug ang importante wala man nato giusab. Ang lyrics sa atong national anthem mao ra man gihapon. Gi-translate lang nato ang atong lenggwahe” dugang ni Sabal.
Sa iyang bahin ni Board Member Dexter Yasay, gibutyag niini nga alang kaniya dili kini kasupakan.
“Ilang gibirahan. Dautan diay nga gamiton nato atong kaugalingon dialekto? Ug isip mga Bisaya grabe ang tahod nato sa wikang Pilipino. Kay kita mag binisaya pag adto og Manila magtinagalog. Unya kung sila moanhi diri magtagalog gihapon kita. Mas lami ug tam-ison nato nga paminawon ang kaugalingon nga pulong. Sala ba diay molitok ug iinterpetar pagkanta sa nasudnong bandila,” matud ni Yasay.
Ang Oro Tri Media Government Watch maoy nagreklamo niini ngadto sa buhatan sa NHCP sa kaulohan kalabot niining Bisaya version nga national anthem.
Ang NHCP nipasalig nga ila kining lantawon kung duna ba kasupakan.
Si Carlo Dugaduga, tigpamaba sa Kapitolyo Probinsyal, niingon nga iyang gikwestyon ang legalidad ug kredibilidad sa Oro Tri Media nga basi sa iyang pakisusi wala narehistro sa Securities Exchange Commission nga gipadala kaniya ni SEC Regional Director Renato Egypto.
“Amo man gisusi sab ilang buhatan diha sa ilang adress sa diha sa 2nd Floor, GPL Banaag Building, Pabayo-Gomez Street. Wala man pod sila diay opisina,” matud ni Dugaduga sa SunStar Superbalita.