35 ka mga gambalay gi-demolish

CAGAYAN DE ORO. Gigamitan og backhoe ang pagpangguba sa ubay-ubay ka mga gambalay nga gitukod sa Gumamela Extension, Barangay Carmen, dakbayan sa Cagayan de Oro. (Kris C. Sialana)
CAGAYAN DE ORO. Gigamitan og backhoe ang pagpangguba sa ubay-ubay ka mga gambalay nga gitukod sa Gumamela Extension, Barangay Carmen, dakbayan sa Cagayan de Oro. (Kris C. Sialana)

NIRESULTA og gamay nga tensyon ang pagpangguba sa composite team sa 35 ka mga gambalay niadtong Lunes, Oktubre 21, sa Lomboy, Gumamela Extension, Barangay Carmen, dakbayan sa Cagayan de Oro.

Gibutyag ni Antonio Resma Jr. sa City Legal Office nga dugay na nga gipahibalo ang mga residente, apan ang pipila gibaligya ang ilang mga area.

“Gitubag naman na nato. They have been awarded previously. Dayon ang problema is ilang gipamaligya, ilang giparentahan ang ilang mga areas nga gi-award sa ilaha,” matud ni Resma.

Ang tinubdan sa tensyon namugna human ang mga residente nibutyag nga wala sila mapahibalo sa ilang lokal nga mga opisyal sa ipahigayon nga clearing operation.

Si Jessa Ansao, 40, emosyonal usab nga nihangyo nga unta mahatagan man lang sila og mabalhinan.

“Ako lang unta nga gub-on man among balay, tagaan pud unta mi og kapuy-an bahalag gamay. Wala gyud mi gipahibalo. Karon pa nianhi ang chairman. Dapat unta gitagaan pa mig layo pa unta nga panahon para makapangita og asa makabalhin. Ing-ani karon, unsaon nalang man ni among mga estudyante ani?” pahayag ni Ansao.

Samtang si Ressa Odasco, 31, ang nibutyag nga igo lang kini niabang sa maong dapit rason nga andam usab kini nga mopahawa.

“Nangabang ra mi diri. P500 walay labot kuryente. Among kuryente P500 pud flying connection. Driver sikad ra biya akong bana,” matud ni Odasco.

Andam usab nga motabang ang lokal nga kagamhanan sa dakbayan sa mga pweding mahatag nga tabang, sama sa housing program ug mga livelihood program.

Apan, giklaro ni Resma nga walay insigidang proyekto, sama sa housing, nga itunol dayon tungod kay kung susama niana daghang mga indibidwal ang magtukod og balay sa tunga sa dalan aron matunolan dayon usab og balay.

Samtang dunay mga pipila nga boluntaryong nangguba sa ilang mga gambalay.

Nasayran nga hugot nga gimando ni Presidente Rodrigo Duterte ang pagbalik sa mga kadalanan o sa road clearing operation diin panggubaon ang mga ilegal nga mga gipangtukod nga nakababag na diha sa mga sidewalks.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph