GILUGOS sa amahan ang iyang kaugalingong anak niadtong Biyernes, Oktubre 18, sa Upper Balulang, dakbayan sa Cagayan de Oro.
Nasikop ang amahan nga si Alyas Roy, 54, dunay kaipon ug lumulupyo sa maong dapit samtang ang anak nag-edad og 15 anyos.
Sa nahipos nga impormasiyon gikan sa kapulisan sa Cagayan de Oro Police Office (Cocpo), gikabutyag nga nasikop mga alas 10:40 niadtong Sabado, Oktubre 19, ang suspek pinaagi na usab sa superbisyon ni Police Major Ian Borinaga, hepe sa Police Station 4 (PS4) sa Carmen.
Nidangop sa kapulisan ang kaipon ni alyas Roy nga si Helen, 42, ug gireklamo ang bana human nasayran nga gilugos niini ang anak.
Giingong mga alas 7 sa gabii gikuha ni Roy ang iyang anak sa Barangay Puntod kay dalhon kini sa ospital tungod sa ubo ug pagkapaos sa tingog, apan nakurat ang anak tungod kay gidala kini sa laing dapit.
Nasayran nga mga alas 10 sa gabii nahitabo ang maong pagpanglugos sulod mismo sa panimalay sa iyaan sa biktima.
Ang suspetsadong amahan nagtingkagol na sa bilanggoan aron sa pag-atubang sa kasong pagpanglugos.